Դեռ չծնված մանուկին փորձում ենք խեղդել. Հրանուշ Հակոբյան

Սահմանադրական բարեփոխումները դրականորեն կազդեն ժողովրդի վրա. այսօր խորհրդարանում լրագրողներին համոզված ասաց Սփյուռքի նախարար Հրանուշ Հակոբյանը:

Պատասխանելով հարցին`եթե այդքան լավ բան է, ինչո՞ւ են մարդիկ այդ լավ մտադրություններին այդքան մեծ կասկածանքով վերաբերվում, նախարարը նշեց. «Ես ձեզ նման՝ որպես քաղաքացի, հեռուստացույցով հետևում եմ «Ոչ»-ի միտինգներին: Խնդրում եմ ասեք՝ որտե՞ղ են այն ահռելի «ոչ»-երը, որ դուրս են եկել փողոց և պահանջում են չընդունել այս Սահմանադրությունը»:

Հարցին` այսինքն՝ «ոչ» չկա՞, Հակոբյանը պատասխանեց. «Չեմ ասում՝ չկա, կան անտարբերներ, կան չեզոքներ, ուշադրություն չդարձնողներ, կան քաղաքականապես ակտիվ երկու թևեր՝ «այո»-ի կողմնակիցներ և «ոչ»-ի կողմնակիցներ: Ես հեռուստատեսությամբ եմ տեսել միտինգները, խնդրում եմ տեսեք՝ քանի՞ հոգի է դուրս եկել և պաշտպանել»:

Նա հիշեց նաև «Գելափ Ինթերնեյշնլ»-ի հրապարակած տվյալները. «29 տոկոսը «այո» է ասում, 26 տոկոսը` «ոչ»: Մեկ ամիս ճամփա կա անցնելու, եկեք՝ համբերենք, ինչո՞ւ եք այդքան ըմբոստացած»:

Նախարարը, արձագանքելով կեղծված ընտրությունների վկայակոչմանը, խիստ վրդովված, ձեռքը սրտին դնելով, հայտարարեց. «Խնդրում եմ՝ էդ բառերը էլ չասեք, ես չեմ ընդունում: Ես իմ օրինակի վրա կարող եմ ասել այն, ինչ տեսել եմ: Եթե դուք այդքան մտահոգված եք կեղծիքներով, մենք ունենք 1900 ընտրատարածք, ընտրատեղամասեր, գնացեք, հսկողություն սահմանեք: Եթե մեր ընդդիմությունը ուժեղ է, կարող է իր անդամների միջոցով հսկել: Մինչև չտեսնեք այդ կեղծիքը, իրավունք չունեք ասելու»:

Դիտարկմանը, թե ընդդիմությունն ասում է՝ իրենց վստահված անձին ծեծի են ենթարկում, ահաբեկում են, վախեցնում, Հրանուշ Հակոբյանը պատասխանեց. «Չեմ հավատում, ես չեմ ուզում հավատալ: Որպեսզի մեր՝ նույնիսկ լավ գործը սևացնեն... Դեռ չծնված մանուկին մենք փորձում ենք խեղդել»: