Հանձնարարականները իրագործվում են մասամբ, բարեփոխումները մնում են թղթի վրա. վարչապետ

Այսօր կառավարության նիստում ՀՀ վարչապետ Կարեն Կարապետյանն իր հանձնարարականների շրջանակում անդրադարձավ գործարար միջավայրի բարելավմանը:

«Օրենսդրական գործնական միջոցառումներից մի քանիսն իրագործվել են, սակայն հասարակության որոշակի հատված դրանց մասին տեղեկացված չէ, որոշ գործարարների դրանք պատշաճ ներկայացված չեն: Գրանցվել են սպասարկման որակի խնդիրներ և այլն: Պարզ վերլուծությունը ցույց է տալիս, որ բարեփոխումների ոչ միայն ծրագրումը, այլև դրանց հետևողական իրականացումը, նոր հնարավորությունների մասին գործարարներին պարբերաբար ծանուցումը, սիստեմատիկ հետադարձի կապի ապահովումը, նոր տեխնոլոգիաների կիրառմանը խստորեն հետևելը բերում ոն լիարժեք փոփոխության: Այսինքն` անհրաժեշտ և ուղղակի պարտադիր է մշակված քաղաքականության մշտական, հետևողական մոնիտորինգը»,- ասաց նա:

Վարչապետն ընդգծեց, որ անհրաժեշտ է, որ մեր քաղաքացին լիարժեք օգտվի արդեն իսկ ընձեռված բոլոր հնարավորություններից, հարկերի վրա ավելի քիչ ժամանակ ծախսի, տեղեկանքների համար չհասնի պատկան գրասենյակներ և այլ:

Նա տնտեսական զարգացման և ներդրումների նախարարին հանձնարարեց, համագործակցելով ռազմավարական նախաձեռնությունների կենտրոն հետ, երկշաբաթյա ժամկետում կառավարության աշխատակազմին ներկայացնել առաջարկություններ՝ գործարար միջավայրի բարելավմանն ուղղված` ՀՀ կառավարության թե՛ կարճաժամկետ, թե' երկարաժամկետ միջոցառումների փաստացի, ոչ թե փաստաթղթային իրագործման, գործարար աշխարհում դրանց տարանցման օբյեկտիվ ցուցիչների կազմման և մոնիտորինգի համակարգի գործարկման վերաբերյալ:

«Ես խնդրել եմ պարոն Գաբրիելյանին` մոտ օրերս անցկացնի խորհրդակցություն, քանի որ մտավախություն ունենք, որ բարեփոխումների մի մասը մնում է թղթի վրա, հանձնարարականները տեղերում իրագործվում են մասամբ կամ ոչ լիարժեք։ Կամ` յուրաքանչյուրը մեկնաբանում է իր պատկերացրածով՝ դա ոնց պետք է կատարվի»,- ասաց Կարապետյանը: