Տոնոյանը չի բացառում «Նաիրիտ»-ում բռնկված հրդեհի պատճառների թվում մարդկային գործոնը

Կառավարության նիստից հետո ԱԻ նախարար Դավիթ Տոնոյանն անդրադարձավ «Նաիրիտ» գործարանի հրդեհի պատճառներին:

«Չեմ կարող գնահատական տալ, քանի որ նախաքննություն է իրականացվում, բայց չեմ բացառում մարդկային գործոնը»,- ասաց նախարարը:

Ինչ վերաբերում է  հրդեհի  ռիսկերը հաշվարկելու հարցին, Տոնոյանը նշեց. «Անձամբ ես հաշվարկել եմ, ռիսկայնությունը հաշվարկված է, աշխատանքներն արդեն իսկ կատարվում էին մինչ այս դեպքը: Ե՛վ աշխատանքային խմբերն էին աշխատում մինչ այս դեպքը, և՛ փորձագետներ են հրավիրվել, բայց հիմա այդ գործընթացներն ավելի կարագանան: Այրված նյութը արտադրական թափոն է, կոնկրետ այդ տարաները անմիջական պահպանության տակ չեն եղել»:

Անդրադառնալով «Նաիրիտի» պահպանության հարցին՝ նախարարը տեղեկացրեց, որ կառավարության որոշմամբ՝ ընդամենը 6 ամիս առաջ գումար է հատկացվել, որ գործարանի պահպանությունն իրականացվի «Նաիրիտ»-ի աշխատակիցների կողմից:

«ԱԻՆ-ը պահպանում չի իրականացնում այնտեղ, ոչ էլ անվտանգությունն է ապահովում: Այս պահին անվտանգությունն ապահովում է գործարանի ներկայիս ադմինիստրացիան: Անմիջական վերահսկողություն ռեզերվուարների նկատմամբ իրականացնել հնարավոր չէ: Դա պետք է արվի վիզուալ: Այնտեղ չենք կարող կանգնեցնել զենքով մարդկանց, որ մթնոլորտային բարձր ջերմաստիճանի պատճառով չտաքանա, գազերը չկուտակվեն և հրդեհավտանգ չլինի: Այդ տարաները, որոնց մեջ պահպանվում են թունաքիմիկատները, հին են: Դրա համար միջոցներ են ձեռնարկվում, որպեսզի չեզոքացվի խնդիրը: Ես խոսք եմ տալիս, որ այս երկու ամսվա ընթացքում լուծումներ կտամ»,- նշեց Դավիթ Տոնոյանը:

Նախարարը տեղեկացրեց, որ ինքը հենց հրդեհի օրը դիմել է միջազգային կառույցներին՝ փորձագետների տրամադրման հարցը լուծելու համար: Նրա կարծիքով՝ այստեղ միայն գնահատականի խնդիրը չէ: «Այստեղ արդեն պրոյեկտ է պետք, թե ինչպես է դա իրականացվելու, ինչպես է պետք տեղափոխել, ոչնչացնել, սառեցնել: Այդ բոլոր հարցերի պատասխանները կունենանք»,- նշեց Տոնոյանը: