Լուրջ խոստումներ են տալիս, բայց երեկ պաշտոն ունեին, բա ինչո՞ւ բան չփոխեցին. Անահիտ Բախշյան

«Ազատ դեմոկրատներ»-ի ցուցակի չորրորդ հորիզոնականը զբաղեցրած Անահիտ Բախշյանն այսօր լրագրողներին հայտնեց, որ ցանկացել է Մալաթիա-Սեբաստիա համայնքում նախընտրական շտաբ բացել, բայց չի կարողացել:  Ի դեպ, այդ խնդրին բախվել է նաև Շիրակի մարզից «Ելք» դաշինքի անդամ Սոֆյա Հովսեփյանը: Նա  ևս չի կարողացել շտաբ բացել:

«Մարդիկ, ովքեր ճանաչում են ինձ, խնդրում են ընտրություններից հետո իրենց տարածքներն անվճար  ու երկարաժամկետ տրամադրել, բայց հիմա վախենում են կորցնել այն ամենը, ինչ ունեն: Մարդկանց մեջ վախի մթնոլորտ են սերմանել այնպես, որ անգամ մարդն իր գույքի տերը չէ, վախենում են ինչ-որ բան անել: Այս երևույթը մարզերում ավելի խորացած է»,- լրագրողներին ասաց Սոֆյա Հովսեփյանը:

Չնայած այս ամենին` Անահիտ Բախշյանը նշեց, որ ամեն բան կախված է հայտ ներկայացրած քաղաքական ուժերի ճիշտ մոտեցումներից:  Նա  անբարոյականություն համարեց վերջերս շրջանառվող թեզը, թե կարելի է վերցնել ընտրակաշառք, սակայն ընտրել նրան, ում ցանկանում ես: «Եթե քաղաքական ուժը լավ ու ճիշտ համոզի, եթե նրա ցուցակի մարդիկ վստահություն ներշնչեն, ժողովուրդը կկողմնորոշվի, քանի որ, միևնույն է, կլինեն մարդիկ, ովքեր չեն մասնակցի ընտրությանը կամ առանց կաշառք չեն մասնակցի: Այնքան մարդիկ կան, որոնք հիմա լուրջ  խոստումներ են տալիս, բայց չէ՞ որ երեկ պաշտոն ունեին, բա ինչո՞ւ  բան չփոխեցին, բա թող անեին»,- ասաց Բախշյանը: