Կենտրոնական զինվորական հոսպիտալում երկու ծանր վիրավոր կա. Անահիտ Բախշյան

Ապրիլյան պատերազմի ընթացքում ծանր վիրավորում ստացած (ողնաշարային վնասվածք) Ռուբեն Առաքելյանի մայրը լրագրողների հետ հանդիպման ժամանակ ասաց, որ տղան կարողանում է շարժել միայն ձախ ձեռքը, իսկ մյուս ձեռքը չի զգում:

Նա և տղան լիահույս են, որ, Գերմանիայում բուժում ստանալով, տղան կունենա ավելի լուրջ ձեռքբերումներ: Զինվորի մայրը նշեց, որ բժիշկները մինչև 70-80% տոկոս վերականգնման մասին են նշում, և տղան ոգևորված է այդ փաստով:

Երևանի ավագանու «Բարև Երևան» դաշինքի անդամ Անահիտ Բախշյանը, ով նույնպես ներկա էր հանդիպմանը, նշեց, որ Ռուբենի նման ևս երկու ծանր վիրավորներ կան կենտրոնական զինվորական հոսպտիալում, և, չգիտես` ինչու, նրանց մասին չի խոսվում:

Նա նշեց, որ այդ տղաներից մեկի վիճակը նույնիսկ ավելի ծանր է, քան Ռուբեն Առաքելյանինը և Արման Լազգիյանինը: Ըստ Բախշյանի` երբ պաշտոնյաներն առողջական լուրջ խնդիրներ են ունենում, գնում են Եվրոպա, իսկ զինվորների հարցում պետությունը հապաղում է:

Նա տեղեկացրեց, որ Արման Լազգիյանի բուժման համար հատկացումներ չեն եղել, իսկ Ռուբեն Առաքելյանին ՊՆ-ն արտաբյուջետային միջոցներից 43 000 եվրո է տրամադրել, վարչապետն էլ` անձնական միջոցներից 20 000 եվրո: Բախշյանն ասաց որ Ռուբենի բուժման համար գումարներն ամբողջությամբ փոխանցված են, տոմսերը` պատվիրված, մնում են ընթացիկ գործողությունները: