Անարդար և կողմնապահ. Թուրքիայի ԱԳՆ-ն՝ Էրդողանի թիկնապահների դեմ Վաշինգտոնի դատախազության ընդունած որոշման մասին

Թուրքիայի ԱԳ նախարարությունը հայտարարություն է տարածել Վաշինգտոնի դատախազության կողմից ընդունված որոշման վերաբերյալ:

 Միջանկյալ նշենք, որ Վաշինգտոնի դատախազությունը դատական գործ է հարուցել Թուրքիայի նախագահ Ռեջեփ Թայիփ Էրդողանի թիկնապահների նկատմամբ, ովքեր նրա՝ ԱՄՆ այցի ընթացքում հարձակվել և դաժան ծեծի էին ենթարկել իրենց ղեկավարի այցի դեմ բողոքի ցույց կազմակերպած հայերին, քրդերին, հույներին և եզդիներին:

Նախարարությունը քննադատել է ԱՄՆ-ում Թուրքիայի նախագահ Էրդողանի 15 թիկնապահի մեղադրանք ներկայացրած մարմիններին՝ որոշումն «անարդար», «կողմնապահ» և «քաղաքականացված» որակելով:

Նախարարությունն այս անգամ էլ չի վարանել Էրդողանի դեմ ցույց կազմակերպողներին ՔԲԿ-ականների (Թուրքիայում ահաբեկչական համարվող՝ Քուրդիստանի բանվորական կուսակցություն) քարոզիչ և կողմնակից որակել: Գերատեսչության պնդմամբ՝ դատախազությունը մեղադրանք է հարուցել նաև թուրք քաղաքացիների նկատմամբ, ովքեր, ըստ նրանց, ոչ միայն չեն մասնակցվել ցույցին, այլև չեն այցելել ԱՄՆ:

Ավելին՝ Թուրքիայի ԱԳ նախարարությունը մեղադրել է ԱՄՆ-ին՝ Էրդողանի այցի ժամանակ անվտանգությունը չապահովելու, ՔԲԿ-ի կողմնակիցների «սադրանքներին» ենթարկվելու համար:

Հայտարարության մեջ նշվել է նաև, որ նախարարությունն այդ հարցով իր դժգոհությունն է հայտնել ԱՄՆ-ում Թուրքիայի դեսպանատանը: