ՊԲ երկու վիրավոր զինծառայողների են տեղափոխել Երևան. մեկի վերջույթն ամպուտացվել է

Երեկ Պաշտպանության բանակի երկու զինծառայողի են տեղափոխել Կենտրոնական կլինիկական հոսպիտալ: Այս մասին քիչ առաջ լրագրողներին հայտնեց ՀՀ զինված ուժերի ռազմաբժշկական վարչության պետ, գնդապետ Կամավոր Խաչատրյանը: Վիրավոր զինծառայողներից` պայմանագրային զինծառայող Ալեքսեյ Ավանեսյանը, ով վիրավորվել է երեք օր առաջ, ստացել է ստորին վերջույթի վիրավորում:

«Երեկ երեկոյան զինծառայողին վիրահատել ենք և ստիպված ենք եղել ամպուտացնել նրա ստորին վերջույթը: Սկզբնական շրջանում փորձել ենք պահպանել վորջույթը, սակայն այն մեզ չի հաջողվել, ներկայումս նրա վիճակ կայուն է»,- ասաց նա:

Խաչատրյանի խոսքով` մյուս վիրավորը` Գուրգեն Սարգսյանը, շարունակում է գտնվել ծայրահեղ ծանր վիճակում, միացված է արհեստական շնչառական ապարատին, դուրս չի եկել կոմայից:

Նշենք որ ՊԲ-ն Ալեքսեյ Ավանեսյանի վիրավորման մասին չի հաղորդել: Խաչատրյանի խոսքով` նա վիրավորվել է հակառակորդի կողմից: