Վարչապետը կրկին հանձնարարում է մտածել ներդրումների մասին

Այսօր` կառավարության նիստի օրակարգին անցնելուց առաջ, վարչապետ Կարեն Կարապետյանը խոսեց ներդրումային ծրագրերի գույքագրման մասին: Նա հանձնարարեց գործադիրի ղեկավարներին, որ յուրաքանչյուրն իր ոլորտում իրականացնի ներդրումային ծրագրերի գույքագրում, կառավարության աշխատակազմ ներկայացնի այն ծրագրերը, որոնցում կանխատեսվում է ներդրումների իրականացում 2017-ին` հստակ նշելով ներդրումների կանխատեսվող ծավալը:

Վարչապետը մասնավորեցրեց, թե ինչի մասին է խոսքը, մասնավորապես` հաջորդ շաբաթվա ընթացքում բոլոր գերատեսչությունները, կոմիտեները հանրությանը հստակ պետք է հաշվետվություն տան, թե 2017-ին իրենց ոլորտներում ինչ ներդրումներ են ակնկալում: Վարչապետը շեշտեց՝ ներդրումների աղբյուրները կարող են տարբեր լինել՝ վարկային, բյուջետային և այլն:

«Այդ կանխատեսումների հիման վրա կառավարությունը պետք է ամփոփի, թե ընդհանուր ինչ ներդրումային ծրագիր է ստանալու»,- ասաց Կարապետյանը՝ շեշտելով, որ հանձնարարականը վերաբերում է նաև կրթության և մշակույթի նախարարություններին: