Ոչինչ չասող, անդեմ պատասխաններ. դիտողություն` գործադիրի բոլոր մարմիններին

Կառավարության այսօրվա նիստում վարչապետ Կարեն Կարապետյանը ՀՀ գործադիր իշխանության բոլոր մարմինների ղեկավարներին հանձնարարեց ուշադրություն դարձնել հասարակության կողմից կառավարության ու վարչապետի առջև բարձրացված կոնկրետ խնդիրներին:

«Հասարակության կողմից կառավարության ու վարչապետի առջև բարձրացված կոնկրետ խնդիրները հաճախ մեր կողմից վերահասցեագրվում են համապատասխան մարմիններին, սակայն երբեմն մարմիններից ստացվում են բարձրացված խնդիրների լուծում և գործուն քայլեր չպարունակող միջոցառումներ, գրեթե ոչինչ չասող, անդեմ պատասխան-գրություններ, հատկապես` եթե դրանք վերաբերում են տվյալ գերատեսչության ոլորտում նոր ծրագրերի կամ բյուջետային ծախսերի ավելացմանը»,- ասաց Կարեն Կարապետյանը:

Նրա խոսքով՝ առանց համապատասխան վերլուծության, շահագրգիռ կառույցների հետ քննարկման և մշակման, միայն խնդրի վերաբերյալ գերատեսչության անդամների տեսական վերաբերմունքը պարունակող գրությունները չեն ընդունվելու, վերադարձվելու են կատարման՝ հսկողությունից չհանելով:

«Լուծման համար անհրաժեշտ է առարկայական միջոցառումների իրականացում: Այդ առումով հանձնարարում եմ կառավարության աշխատակազմի ղեկավար-նախարարին` հետևել հանձնարարականների կատարման որակին՝ հաշվի առնելով նշվածը: Կարծում եմ՝ այս հանձնարարականը մեկնաբանել անհրաժեշտ չէ, հասկանալի է՝ ինչի մասին է խոսքը»,- ընդգծեց Կարեն Կարապետյանը: