Որոշ տնտեսվարող սուբյեկտներ կարող են հրաժարվել բրոքերի ծառայությունից

Այսօր ԱԺ նիստում քննարկվում է  կառավարության և ԱԺ պատգամավոր Էդմոն Մարուքյանի կողմից ներկայացված` մաքսային կարգավորման մասին ՀՀ օրենքում փոփոխություններ ու լրացումներ անելու մասին նախագիծը, որը նախատեսում է մաքսային միջնորդի` բրոքերի ծառայություններից չօգտվելու հնարավորություն այն անձանց համար, ովքեր օտարերկրյա քաղաքացիություն ունեն  և տեղափոխում են անձնական օգտագործման ապրանքներ, անձինք, ովքեր ԵՏՄ անդամ երկրների քաղաքացիներ են  և առաքում են տարանցիկ փոխադրման նպատակով, և անձինք, ովքեր անհատ ձեռնարկատեր չեն և իրականացնում են ներմուծումներ ու արտահանումներ:

Առաջարկվում է հանել պարտադիր պահանջը, և  տնտեսվարողներն իրենք կարող են ընտրել` ինքնահայտարարագրել կամ դիմել բրոքերին:

Երկրորդ կարգավորումը վերաբերում է փոքր սուբյեկտներին, որոնք տեղափոխում են մինչեւ 200 եվրո արժեքով գույք: Գործող օրենքով նման ապրանքներ ներմուծելիս մարդիկ պետք է 6500 դրամի չափով մաքս վճարեին: Առաջարկվող փոփոխությունները բյուջեի վրա չեն ազդելու, որովհետև  բրոքերային ծառայությունը ուղղվում էր սուբյեկտի գրպանը, իսկ 6500 դրամ մաքսավճարը արտաբյուջետային հաշվի մեջ էր մտնում:

Էկոնոմիկայի նախարարին հարց ուղղեց «Ժառանգություն» խմբակցության պատգամավոր Թևան Պողոսյանը: «Ականատես ենք փոփոխությունների: Չգիտեմ` ով որտեղ կհայտնվի, բայց ասվում է, որ համակարգային փոփոխություններ են ընդունվելու: Արժե՞ հիմա այս փոփոխությունն անել, որքա՞ն երկար այն կտևի»,- ասաց պատգամավորը` առաջարկելով հիմնարար փոփոխություններ ու նոր մոտեցումներ իրականացնել գուցե երկու շաբաթ անց, այլ ոչ թե այս փոփոխությունը ընդունել 24 ժամվա ընթացքում:

Արծվիկ Մինասյանը նշեց, որ առաջարկվող փոփոխությունը կիսատ-պռատ լուծում չէ և վերաբերում է փոքր սուբյեկտների գործունեության թեթևացմանը: Նախարարը հորդորեց պատգամավորներին` այդ փոփոխությունը ընկալել որպես սկզբունքային ու հիմնարար: «Մենք հնարավորություն ենք տալիս ցանկացած տնտեսվարող սուբյեկտի, որ նա ինքնահայտարարագրի ներմուծումներն ու արտահանումները` առանց բրոքերի ծառայություն ստանալու և նրան վճարելու»,- ասաց նա: