Եթե պետությունը չի զբաղվում մշակութային հուշարձաններով, գալիս են մարդիկ, ովքեր շատ կոնկրետ զբաղվում են. Արմեն Ամիրյան

Մամուլում տեղ գտած յուրաքանչյուր հրապարակում, յուրաքանչյուր կարծիք, ցանկացած մամուլի ասուլիսում հնչեցված կարծիք, այս պահից սկսած, դառնում է հանձնարարական. այսօր խորհրդարանում կառավարություն-ԱԺ հարցուպատասխանից առաջ լրագրողների հետ զրույցում ասաց ՀՀ մշակույթի նախարար Արմեն Ամիրյանը:

Անդրադառնալով Արամի 30-ի, Աֆրիկյանների շենքի ճակատագրին՝ նախարարն ասաց. «Եթե պետությունը չի զբաղվում մշակութային հուշարձաններով, գալիս են մարդիկ, ովքեր շատ կոնկրետ զբաղվում են այդ հուշարձաններով: Մենք պետք է զբաղվենք, որ այլ մարդիկ չգան ու չավերեն: Մենք մշակում ենք հիմա ենթակառուցվածքներ, որոնք պետք է ծառայեցնեն այդ հուշարձանները՝ ի շահ հասարակության, զբոսաշրջության զարգացման, մեր երեխաների դաստիարակության»:

Ի դեպ, Ամիրյանը չցանկացավ պատասխանել հարցին, թե, ի վերջո, ինչպես նշում էր Լևոն Իգիթյանը, Արամի 30-ը «սարա՞յ» է, թե՞ ոչ:

Խոսելով Գրին քարտ ունենալուն վերաբերող հրապարակումներին` նախարարն ասաց. «Գրին քարտը ոչ թե դիմել և ստացել եմ, այլ շնորհվել է ԱՄՆ-ի կողմից` որպես պետության համար պահանջված մարդ, որոշակի ոլորտներում ծառայություններ կատարելու համար»:

Նա անդրադարձավ նաև վերջին շրջանում մեծ աղմուկ բարձրացրած «Ամենակարող երգիչ» նախագծին: «Մշակույթի նախարարությունը ոչ մի ազդեցություն չունի Հանրային հեռուստաընկերության գործառույթների վրա: Ինչ վերաբերում է դիրքորոշմանը, ապա մշակույթի նախարարությունը մոտ ապագայում ծրագրում է ձևավորել պատվեր՝ մասնավոր հեռուստաընկերությունների պահով: Խոսքը, մասնավորապես, վերաբերում է ազգային երգ և երաժշտությանը»,- ասաց նախարարը;

Հարցին, թե հնարավո՞ր չէ եթերում նվազեցնել ռաբիսի առկայությունը, Ամիրյանը պատասխանեց, որ ժամանակի ընթացքում մշակութային ծրագրերի շնորհիվ հայ ազգին ոչ հարիր երաժշտական ժանրերն իսպառ կվերանան:

Հարցին, թե` Ձեր անձնական դիրքորոշմամբ` պե՞տք է Հանրային հեռուստատեսությամբ նման երաժշտություն հրամցվի, նախարարը պատասխանեց. «Հանրային հեռուստատեսությունը ոչ միայն պետք է կրթի, այլև պետք է ապահովի ժամանց: Ժամանցային հաղորդումներն, անշուշտ, անհրաժեշտ են, բայց շատ ճիշտ եք նկատում՝ որակի խնդիր կա»:

Ամիրյանի խոսքով՝ մշակույթի նախարարությունը, բոլոր օղակներով միավորված, պետք է կարողանա ձևավորել մշակութային ճիշտ քաղաքականություն: