ՀՀԿ-ն չմասնակցեց քվեարկությանը

Այսօր ԱԺ հերթական քառօրյան է: Քվեարկության դրվեց «Ժառանգություն» խմբակցության պատգամավոր Զարուհի Փոստանջյանի նախաձեռնած՝ խաղաղ պայմաններում զինծառայողների մահվան փաստով քրեական գործերի քննության արդյունավետությունն ու թափանցիկությունն ապահովելու նպատակով ԱԺ ժամանակավոր հանձնաժողով ստեղծելու վերաբերյալ ԱԺ որոշումը:

Զարուհի Փոստանջյանը վարման կարգով ելույթ ունեցավ` ասելով, որ եթե ԱԺ նախագահն այդ հանձնաժողովը չստեղծի, հետագայում նա նույնպես պետք է պատասխանատվության ենթարկվի: Նա հավելեց, որ ներկա պահին ԱԺ շենքի դիմաց կանգնած են զոհված զինծառայողների մայրերը:

ԲՀԿ և ՕԵԿ խմբակցության ղեկավարներ Նաիրա Զոհրաբյանն ու Հեղինե Բիշարյանը էլ նշեցին, որ հասարակությունը պարտք է զոհված զինծառայողների ծնողներին, և այդ ժամանակավոր հանձնաժողովը պետք է ստեղծվի: ԲՀԿ խմբակցության պատգամավոր Էլինար Վարդանյանը նույնպես կողմ է դրան:

ՀՀԿ խմբակցության քարտուղար Գագիկ Մելիքյանը նշեց, որ կա խնդիր, որն իրավական դաշտում է, ուստի կփորձեն չխանգարել իրավական գործընթացին: «Այդ պատճառով նպատակահարմար չենք գտնում մասնակցել քվեարկությանը»,- ասաց նա:

Քվեարկությամբ գրանցվեց 28 կողմ, 0 դեմ և 2 ձեռնպահ. որոշումը չընդունվեց: