Կարեն Կարապետյանն ազատ է կադրային հարցում. Վահրամ Բաղդասարյան

ԱԺ ՀՀԿ խմբակցության ղեկավար Վահրամ Բաղդասարյանն այսօր խորհրդարանում, լրագրողների հետ զրույցում անդրադառնալով ռուսական «Ինտերֆաքս» գործակալության հրապարակած այն տեղեկությանը, թե Սեյրան Օհանյանը նշանակվելու է ՀԱՊԿ գլխավոր քարտուղար, նշեց, թե նման քննարկումներ չեն եղել, և Օհանյանը ՀՀ պաշտպանության նախարարն է:

Անդրադառնալով Կարեն Կարապետյանի՝ վարչապետի պաշտոնում նշանակմանը, նշեց, որ ինքը շնորհավորում է Կարապետյանին, իսկ նոր կառավարության կազմի ձևավորման մասին ասաց, որ աշխատանքները շարունակվում են:

Հարցին` Հովիկ Աբրահամյանի գլխավոր ձախողումը ո՞րն էր, Բաղդասարյանը պատասխանեց. «Այդ թեմային մենք անդրադարձել ենք. Հովիկ Աբրահամյանը գոհ չէր տեմպերից, բայց բավական քրտնաջան աշխատանք էր կատարել այս 2.5 տարիների ընթացքում»:

Նա նշեց նաև, որ ազգային համաձայնության կառավարության ձևավորման հարցին կանդրադառնան 2017 թվականի խորհրդարանական ընտրություններից հետո:

Ըստ Բաղդասարյանի`Կարեն Կարապետյանն ազատ է կադրային հարցում:

ԱԺ ՀՀԿ խմբակցության ղեկավարը շրջանցեց այն հարցը, թե ի՞նչ կլինի, եթե Կարեն Կարապետյանին բարձր աշխատավարձով աշխատանք առաջարկեն դրսից, ինչպես եղավ նրա` քաղաքապետ եղած ժամանակ: