«Շուտով». Շարմազանովը՝ ՀՅԴ-ՀՀԿ համագործակցության հուշագրի ստորագրման մասին

Տեղեկացրել էինք, որ այսօր ԱԺ նախագահ Գալուստ Սահակյանին տեսակցության էր եկել նաև ԱԺ փոխխոսնակ Էդուարդ Շարմազանովը:

Լրագրողների հետ զրույցում նա անդրադարձավ նաև ՀՀԿ-ՀՅԴ հնարավոր համագործակցությանը:

Հարցին, թե այսօրվա ԳՄ նիստի ընթացքում չսպասե՞նք համապատասխան հուշագրի ստորագրմանը, Շարմազանովը պատասխանեց, որ հուշագրերը չեն ստորագրվում ԳՄ նիստի ժամանակ: «ԳՄ նիստը քննարկում է կուսակցական և քաղաքական խնդիրներ, իսկ կարևորի մասին և՛ ես, և՛ Դաշնակցության իմ գործընկերներն արդեն ասել ենք` ՀՀԿ-ն և ՀՅԴ-ն հանգել են ընդհանուր, միասնական եզրակացության, այսինքն` մենք պատրաստակամ ենք միասնական աշխատանքի միջոցով իրականացնել մեր ծրագրերը»,- ասաց նա:

Ճշտող հարցին, թե քաղաքական երկու ուժերի միավորման փաստը ե՞րբ կարձանագրվի, Շարմազանովը պատասխանեց` շուտով:

«Համագործակցության հետևանքով լրացուցիչ աշխատատեղերի բե՞ռ չի ընկնում պետության վրա» հարցին էլ ԱԺ փոխխոսնակը պատասխանեց, որ սա հարց է, որի պատասխանն իր լիազորությունների շրջանակում չէ: «Վաղը կլուսաբանեք ԱԺ նիստը և ձեզ համար ամեն ինչ պարզ կլինի»,- նշեց նա: