ՀՅԴ-ն ու ՀՀԿ-ն կստորագրեն «Քաղաքական համագործակցության մասին» համաձայնագիր

Տարածքային կառավարման և արտակարգ իրավիճակների նախարարության տարանջատումը Դաշնակցության և Հանրապետականի համագործակցության առաջին արտահայտությունն է: Այս մասին «Ազատության» հետ զրույցում նշեց ԱԺ ՀՅԴ խմբակցության ղեկավար Արմեն Ռուստամյանը` հավելելով՝ այդ ոլորտների տարանջատումից հետո տարածքային կառավարման նախարարի պաշտոնում կնշանակվի դաշնակցական Դավիթ Լոքյանը:

«Այդ հարցերը նույնպես քննարկվել են այս ընթացքում, սա նույնպես եղել է մեր բանակցությունների թեման: Այնպես որ` սա արդեն առաջին, այսպես ասած՝ մեր համագործակցության արտահայտություններն են, և այդ խնդիրները նախապես քննարկվել են»,- ասաց նա:

Հարցին՝ նշված ոլորտների տարանջատումը հենց ՀՅԴ-ի՞ առաջարկն է եղել, Ռուստամյանը պատասխանեց. «Համատեղ, կարելի է ասել: Մենք հիմա այստեղ չենք ուզում առանձնացնել հատկապես մեր մոտեցումները: Մենք դա արել ենք համախոհաբար, և սա առաջին` դեռևս չստորագրված համաձայնագրի դրսևորումն է»:

Ըստ Արմեն Ռուստամյանի` Հանրապետականի հետ համագործակցության շրջանակներում, տարածքային կառավարման նախարարությունից բացի, ևս 2 ոլորտ կտրվի Դաշնակցությանը. խոսքը կրթության և գիտության ու էկոնոմիկայի նախարարությունների մասին է: Դաշնակցական պատգամավորը հաստատեց՝ կրթության և գիտության նախարար կնշանակվի Լևոն Մկրտչյանը, էկոնոմիկայի նախարար՝ Արծվիկ Մինասյանը:

ՀՅԴ-ին կտրվեն նաև Արագածոտնի և Շիրակի մարզպետերի պաշտոնները:

Ռուստամյանը «Ազատության» հետ զրույցում այլ փակագծեր էլ բացեց` մասնավորապես, տեղեկացնելով, որ առաջիկայում Հանրապետականի և Դաշնակցության միջև ստորագրվելիք փաստաթուղթը կկոչվի «Քաղաքական համագործակացության մասին» համաձայնագիր: Դրանում փոխզիջումային տարբերակով տեղ են գտնելու այն բոլոր հարցերը, որոնք երկու ուժերը «համարում են հրատապ և պետք է լուծվեն համատեղ ջանքերով»:

Մանրամասները` սկզբնաղբյուր կայքում: