Որ ինձնով էլնի, Բաքուն էլ կվերցնենք. Սեյրան Սարոյան

Այսօր լրագրողները ԱԺ ՀՀԿ խմբակցության պատգամավոր Սեյրան Սարոյանից հետաքրքրվեցին, թե ինչպես կմեկնաբանի ԱԺ ՀՀԿ խմբակցության պատգամավոր Լևոն Մարտիրոսյանի աղմկահարույց մեկնաբանությունը, թե «չի բացառվում, որ ինչ- որ ժամանակահատվածում, որպես կոմպրոմիսային տարբերա, քննարկվի ԼՂ տարածքները Ադրբեջանին հանձնելու հարցը»:

Սեյրան Սարոյանը նախ չհավատաց լրագրողներին՝ ասելով. «Լավ էլի, շառ եք անում, լավ էլի, ինքը տենց բան չի ասել»:

Լրագրողները հարցրեցին՝ այդ դեպքում ինչպիսի՞ն է իր տեսակետը ԼՂ հարցում զիջումների վերաբերյալ: «Ոչ մի բան էլ չենք զիջի, փոխանակ առաջ էթանք, զադնի ենք էթո՞ւմ: Մեր զադնի սկորոստը փչացել ա, չի աշխատում, չկա: Որ ինձնով էլնի, ես կուզեմ սաղ վերցնեմ, Բաքուն էլ՝ հետը»,- ասաց Սեյրան Սարոյանը և խոստովանեց, որ այնպիսի հարց, ինչպիսին ԼՂ հարցն է, միշտ էլ լուծման երկարատև ճանապարհ է անցնելու: «Սենց հարցերը վերջ չունեն»,- ասաց պատգամավորը՝ համաձայնելով, որ փակուղային վիճակ է ստեղծվել ԼՂ հարցում:

Նա խոսեց նաև սահմանադրական փոփոխությունների քարոզարշավի մասին՝ ասելով, որ հանդիպումներ է ունենում իր ընտրատարածքի բնակիչների հետ և քարոզում է «այո»-ն: Լրագրողներից մեկի դիտարկմանը, որ չի կարելի աշխաանքի ժամին քարոզել, Սեյրան Սարոյանը կատակեց. «Չես տենո՞ւմ, որ աշխատում եմ, քիչ ա մնացել՝ տեղաշոր բերեմ, ստեղ քնեմ»: