Ոչ բոլոր գյուղացիները պետք է զբաղվեն հողագործությամբ. ՀՀԿ-ական

ՀՀԿ-ական պատգամավոր Լեռնիկ Ալեքսանյանը լրագրողների հետ հանդիպման ընթացքում անդրադարձավ Հայաստանում գյուղատնտեսության ոլորտում առկա բացթողումներին: Ըստ նրա`այդ ոլորտի խնդիրներն իրավիճակային և արմատական են:

«Եթե խոսենք այսօրվա խնդիրների մասին, պետք է խոստովանենք, որ եթե չլիներ կառավարության միջամտությունը, վիճակն ավելի վատ կլիներ: Սա չի նշանակում, որ հիմա ամեն ինչ լավ է: Իրացման խնդիր ունեն նաև գործարանները: Մենք 340 հազար տնտեսություն ունենք: Գյուղատնտեսության ոլորտում համակարգային փոփոխություններ են պետք: Կազմակերպչական բնագավառում կան բազմաթիվ բացթողումներ»,- ասաց Ալեքսանյանը:

«Այսօր Երևանի ամեն շենքի բակում պետք է մի հատ տաղավար սարքվի: Միջանկյալ փող աշխատողները պետք է վերանան: Այդ տաղավարներում կարող են մթերք վաճառվել: Քաղաքացին շատ է վճարում, քան վաճառում է գյուղացին: Մի կարևոր հարց էլ կա` ոչ բոլոր գյուղացիները պետք է զբաղվեն հողագործությամբ: Մանկավարժը, բժիշկը թող իրենց գործով միայն զբաղվեն»,- եզրափակեց պատգամավորը: