Երանի ես կարողանայի ռաբիս երգել. Ձախ Հարութ

Երանի ես կարողանայի ռաբիս երգել. «Ազատություն» TV-ի ֆեյսբուքյան ասուլիսի ժամանակ ասաց երգիչ, ՀՀ վաստակավոր արտիստ Հարութ Փամբուկչյանը` պատասխանելով հարցին, թե արդյո՞ք ինքն իրեն ռաբիս երգիչ է համարում:

Նա նշեց, որ ռաբիս երգելը հեշտ բան չէ իրականում: «Եթե ուզում եք իմանալ, կլկլացնելը հեշտ չի: Շատերն ասում են` օ, մենք չենք կլկլացնում, բայց չեն կարողանում կլկլացնել, դրա համար են այդպես ասում: Իմ ժանրն ուրիշ է: Անարժեք երգեր, այո, երգել եմ, բայց փորձել եմ սովորել իմ սխալների վրա և ուղղել դրանք: Եղել է ժամանակ` տուրք եմ տվել ժողովրդի ցանկությանը` ծափ-զլնգոցին»,-ասաց Փամբուկչյանը:

Նա նշեց նաև, որ ԱՄՆ-ում հիմա ռաբիսն այնքան էլ չի լսվում և ռաբիս երգիչները հիմա արդեն դահլիճ չեն հավաքում: «Եթե այստեղից երգիչներ են գնում ԱՄՆ, ժողովուրդն այլևս չի գնում այդ երգերի հետևից, լուրջ ծրագիր են ուզում: Այստեղ կան ռաբիս երգիչներ, որոնց համերգին ԱՄՆ-ում չեն գնում»,- ասաց Փամբուկչյանը: