Եթե այդքան վատ եք մտածում Արմենչիկի մասին, ինչո՞ւ եք վազում համերգին. Ձախ Հարութ

«Մարդիկ շատ վաղուց ինձ հարցնում էին` որևէ կոչում ունե՞ք, ես էլ պատասխանում էի` ի՞նչ է կոչումը, իմ կոչումը ժողովուրդը վաղուց է տվել»,- «Ազատություն» TV-ի ֆեյսբուքյան ասուլիսի ժամանակ ասաց երգիչ, ՀՀ վաստակավոր արտիստ Հարութ Փամբուկչյանը` անդրադառնալով իր` նախագահի կողմից վաստակավոր արտիստի կոչմանն արժանանալու փաստին:

Նա նշեց, որ 50 տարի է` բեմում է և իր հանապազօրյա հացը վաստակում է երգելով: «Երբ լսեցի, որ կոչման եմ արժանացել, անակնկալ չէր ինձ համար, սպասում էի: Իհարկե, շատ հաճելի է ընդունված լինել ժողովրդի կողմից, բայց, միևնույն ժամանակ, կարծում եմ, որ կառավարական շրջանակները, մշակույթի նախարարությունը երբ ներկայացնում են քեզ, ուրեմն ինչ-որ մի աստիճան ավելի բարձր ես կանգնած, և դա ինձ ուրախացնում է»,- ասաց երգիչը:

Հարցին, թե արդյո՞ք իրեն վատ չի զգում, որ Արմենչիկի հետ միասին է ստացել ՀՀ վաստակավոր արտիստի կոչում, պատասխանեց, որ վատ զգալու ոչ մի բան չկա, քանի որ ամեն մարդ իր հանդիսատեսն ունի: «Մենք ընկերներ են, ձայնագրություններ ենք արել միասին, ապրում ենք նույն քաղաքում: Զարմացա, որ այսքան քննարկվեց այդ թեման. ինչ մտածում են` ասում են: Եթե այդքան վատ եք մտածում իր մասին, բա որ համերգ է տալիս, ինչո՞ւ եք վազում` տոմս գնելու: Բոլորը գնում-լցվում են դահլիճ, տոմսերը մինչև վերջ ծախված են լինում»,- ասաց երգիչը:

Ձախ Հարութի կարծիքով` Արմենչիկը երգեր ունի, որոնք ինքն, իրոք, չի ընդունում, բայց երգեր կան, որ իսկապես լավ է կատարում: «Օրինակ` «Անցիր, այ գետակ»-ը, որ մենք միասին ենք երգում: Եթե նրան լսող կա, ուրեմն մի բան արել է այդ տղան, հո չենք կարող ասել, որ ոչ մի բան չի արել: Երգեր կան, որ ես էլ չեմ ընդունում, բայց կան երգեր, որ ռաբիս չեն»,- ասաց նա: