Սարգսյանն ու Պուտինը կքննարկե՞ն սահմանային լարվածությունը

Հայտնի է, որ Հայաստանի նախագահ Սերժ Սարգսյանն աշխատանքային այցով Մոսկվայում է: Նա այսօր հանդիպելու է ՌԴ նախագահ Վլադիմիր Պուտինի հետ: Ըստ պաշտոնական հաղորդագրության` երկու երկրների ղեկավարները կքննարկեն հայ-ռուսական երկկողմ համագործակցությանն առնչվող հարցեր, մտքեր կփոխանակեն ԵԱՏՄ-ին Հայաստանի անդամակցությունից հետո ինտեգրացիոն գործընթացների մասին:

Yerkir.am-ի հետ զրույցում ՀՀԿ խմբակցության ղեկավար Վահրամ Բաղդասարյանը նշեց, որ հանդիպման վերաբերյալ ոչինչ հայտնի չէ, և որ պետք է սպասել հանդիպմանը հաջորդող պաշտոնական հաղորդագրություններին:

Դիտարկմանը, որ այս օրերին, երբ  հայ-ադրբեջանական և ղարաբաղա-ադրբեջանական շփման գծում իրավիճակը լարված է, հանրությունն այդ հանդիպումը, ըստ էության, կապում է դրա հետ` հույսով, որ կգտնվի որևէ լուծում, որը վերջ կդնի լարվածությանը, մեր զրուցակիցը պատասխանեց. «Սարգսյան-Պուտին հանդիպման վերաբերյալ պայմանավորվածությունը եղել է մինչև սահմանային վիճակի լարվածությունը»:

Հարցին, որ թեեւ պաշտոնական հաղորդագրության մեջ սահմանային լարվածության մասին խոսք չկա, բայց հնարավո՞ր է հարցը բարձրացվի, Վահրամ Բաղդասարյանը պատասխանեց, որ չի ուզում ենթադրություններ անել, պետք է սպասել, հավանաբար այսօր երեկոյան հաղորդագրություն կտարածվի հանդիպման վերաբերյալ: