ՀՔԾ լրատվականի հետ գործ ունենալը՝ գլխացավանք

Yerkir.am-ը նախկինում առիթ ունեցել է անդրադառնալու ՀՀ Հատուկ քննչական ծառայությունից տեղեկություն ստանալու հետ կապված դժվարություններին:  Հայտնի է, որ այդ կառույցը գրեթե չի պատասխանում լրատվամիջոցների բանավոր հարցումներին՝ խորհուրդ տալով գրավոր հարցում ուղարկել:

Հաշվի առնելով ՀՔԾ-ում գործող «ավանդույթը»` yerkir.am-ը մեկ շաբաթ առաջ «Պանտերա» պահնորդական ընկերության աշխատակցին ծեծի ենթարկելու գործի վերաբերյալ պաշտոնական հարցում էր ուղարկել ՀՔԾ-ին: Հարցումն ուղարկվել էր ՀՔԾ-ի այն էլեկտրոնային  հասցեին, որին ժամանակին հարցումներ էինք ուղարկում:  Հաշվի առնելով, որ, որպես կանոն, ՀՔԾ-ն «չի ստանում», ուղարկված հարցումները, փորձեցինք հարցման մասին բանավոր տեղեկացնել, սակայն երկու օր շարունակ մեզ չհաջողվեց կապ հաստատել ՀՔԾ մամլո խոսնակ Միքայել Ահարոնյանի հետ: Միայն 3-րդ օրը նա պատասխանեց մեր հեռախոսազանգին: Պարզվեց` ՀՔԾ-ի էլեկտրոնային փոստի հասցեն փոխվել է: 

Օգոստոսի 28-ին yerkir.am-ը կրկին հարցում ուղարկեց, այս անգամ` ՀՔԾ-ի էլեկտրոնային փոստի ճիշտ  հասցեին: Եվ ահա այսօր` մեր գրավոր հարցման` օրենքով նախատեսված 5-օրյա ժամկետի ավարտին, պարզեցինք, որ ՀՔԾ-ն մեզ հուզող թեմայի վերաբերյալ հաղորդագրություն է տարածել:

Մի խումբ անձանց կողմից «Պանտերայի» աշխատակցի  առողջությանը դիտավորությամբ միջին ծանրության վնաս պատճառելու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 113-րդ հոդվածի 2-րդ մասի 3-րդ կետով հարուցվել է քրեական գործ:

Անշուշտ, հաղորդագրությունն ուղարկվել է նաև մեր լրատվամիջոցին, սակայն մեր հարցման պատասխանն այդպես էլ չի ուղարկվել: Հետաքրքիր է` Հատուկ քննչական ծառայությունում, հանձին` Միքայել Ահարոնյանի, այն կարծիքին են, որ լրագրողները ողջ օրը  պարա՞պ են և անպատասխան հարցումներ ուղարկելու մեծ սիրահա՞ր:

Հատուկ ՀՔԾ մամլո խոսնակի համար՝  վերը նշված գործի (և ոչ միայն) օրինակով մի  քանի նրբություն բացատրենք.

1. Եթե լրատվամիջոցի ներկայացուցիչը Ձեզ բանավոր հարցնում է` ճի՞շտ է, արդյոք, որ X գործի նյութերը X կառույցը փոխանցել է ձեզ, կարող եք պատասխանել՝ այո կամ ոչ: Վստահեցնում ենք, որ դա ճշտելու համար Ձեզնից շատ քիչ ժամանակ կպահանջվի:

2. Եթե ձեր կառույցի համապատասխան պաշտոնյաները Ձեր ճշտող հարցին պատասխանելու  ժամանակ կամ ցանկություն չունեն, կարող եք  բացել կայքերը և կարդալ X  կառույցի ձեր գործընկերոջ մեկնաբանությունը (կոնկրետ այս դեպքով` դատախազությունը հաստատել էր,  որ գործը փոխանցել է):

3.Եթե գործի նյութերը փոխանցվել են, սակայն ՀՔԾ-ն դեռ չի ստացել, կարող եք պարզապես պատասխանել, որ` այո, փոխանցվել է, ստացվել է, թե` ոչ, կտեղեկացնենք լրացուցիչ:

4. Եթե նույնաբովանդակ գրավոր հարցումներ ստացել եք մի քանի լրատվամիջոցներից և առանձին-առանձին պատասխանելու ժամանակ չունեք, գոնե զգուշացրեք լրատվամիջոցին, որ հաղորդագրություն եք տարածելու:

5. Եթե «մոռացել եք» պատասխանն ուղարկել լրատվամիջոցին, և հաղորդագրությունը կարդալուց հետո Ձեզ զանգահարում է հարցումն ուղարկած լրագրողը, մի փորձեք ամեն կերպ արդարանալ: Վստահ եղեք, որ լրագրողն անկեղծ ասված խոսքին ըմբռնումով կմոտենա: