Քննչական ծառայության պետ Վահրամ Շահինյանը կհամալրի պետական գաղտնիքով օժտվածների շարքը

Կառավարության վաղվա նիստում ներկայացվելու է որոշման նախագիծ, համաձայն որի` տեղեկությունները պետական և ծառայողական գաղտնիքի շարքը դասելու լիազորություններով օժտված պետական մարմինների պաշտոնատար անձանց ցանկը համալրվում է ևս մեկ պաշտոնով, այն է` ՀՀ հատուկ քննչական ծառայության պետը:

Հիմնավորումը հետևյալն է, որ ՀՀ հատուկ քննչական ծառայության գործառութային առաքելությունն ուղղակիորեն ենթադրում է նաև վերջինիս գործունեության ընթացքում գաղտնիության որոշակի մակարդակի ապահովում: Առաջարկվող նախագծով արծարծվող մտահոգությունը պայմանավորված է այն իրողությամբ, որ տեղեկությունները պետական և ծառայողական գաղտնիքի շարքը դասելու լիազորություն ունեցող սուբյեկտների շարքում անհասկանալի պատճառներով Հատուկ քննչական ծառայության պետը դեռևս չի նախանշվել:

Առկա իրավակարգավորման բացը խնդիրներ է առաջացնում այն իմաստով, որ ստացվում է` նախաքննական մարմնի ղեկավարը, ով իր պաշտոնեական առաքելությամբ առնչվում է հենց խնդրո առարկա բնույթի տեղեկատվությանը, անմիջականորեն տիրապետելով այն, ի պաշտոնե չունի տեղեկությունը պետական կամ ծառայողական գաղտնիքի շարքին դասելու լիազորություն: Կարծում ենք, առկա բացի վերացման օբյեկտիվ անհրաժեշտությունն ակնհայտ է, որի ապահովմանն է միտված սույն նախագծի ներկայացումը:

Նախագծի ընդունումը նպատակ ունի ՀՀ հատուկ քննչական ծառայության պետին ընդգրկել տեղեկությունները պետական և ծառայողական գաղտնիքի շարքը դասելու լիազորություններով օժտված պետական մարմինների պաշտոնատար անձանց ցանկում, որով իրավունք կվերապահվի ՀՀ հատուկ քննչական ծառայությունում ստեղծել պետական և ծառայողական գաղտնիքի շարքը դասելու ենթակա տեղեկությունների ցանկը: