Անկարան ցավում է և հիասթափված է. Թուրքիայի ԱԳՆ

Թուրքիայի ԱԳՆ-ն Վատիկանի դեսպանին հաղորդել է, որ «Անկարան ցավում է և հիասթափված է» Հռոմի պապի հայտարարությունից: Այս մասին հաղորդում է Reuters-ը:

Թուրքիայի արտգործնախարության ներկայացուցչի խոսքով` Հռոմի պապի  հայտարարությունը «վստահության խնդիր է առաջացրել» Անկարայի և Վատիկանի հարաբերություններում:

Թուրքական «Հաբերլեր» կայքի հաղորդմամբ՝ այդ երկրի արտաքին գերատեսչությունը հանդես է եկել նաեւ հայտարարությամբ, որում նշվում է. «Վատիկանը ցուցաբերել է միակողմանի մոտեցում և ներկայացրել է միայն հայերի ցավը՝ մոռանալով այդ նույն ժամանակ մահմեդականների ապրած ցավերը»:

Առանձին հայտարարությամբ է հանդես եկել նաեւ Թուրքիայի արտգործնախարար Մեւլուդ Չավուշօղլուն: «Կրոնական կառույցներն անհիմն պնդումների միջոցով թշնամանք և ատելություն սերմանելու վայրեր չեն: Հռոմ պապի՝ պատմական և իրավական իրողություններից հեռու հայտարարությունը չի կարող ընդունելի լինել»,- հայտարարել է Թուրքիայի արտգործնախարարը:

Հիշեցնենք, որ ավելի վաղ՝ այն բանից հետո, երբ Հռոմի պապը  Սուրբ պատարագի ժամանակ արտասանել էր «ցեղասպանություն» բառը, Թուրքիայի ԱԳՆ-ն  հետ էր կանչել Վատիկանից իր դեսպանին, ինչպես նաեւ իր մոտ էր հրավիրել Թուրքիայում  Վատիկանի դեսպանին: