Չի ցանկանում մնալ ԲՀԿ-ում, որովհետեւ չկա Ծառուկյանը

Սիսիանի` արդեն նախկին ԲՀԿ-ական քաղաքապետ Աղասի Հակոբջանյանը Yerkir.am-ի հետ զրույցում պարզաբանեց իր՝ ԲՀԿ-ն լքելու պատճառը: Նա ասաց. «Քանի որ Գագիկ Ծառուկյանն այլևս ԲՀԿ-նախագահ չէ, ես չեմ ցանկանում մնալ կուսակցության կազմում»:

Մեր հարցին, թե գուցե Նաիրա Զոհրաբյանի գործոնո՞վ է պայմանավորված իր՝ ԲՀԿ-ն լքելու հանգամանքը, Հակոբջանյանը պատասխանեց` ոչ:

Ի դեպ, Աղասի Հակոբջանյանը միակ քաղաքապետն է, ով եռյակի կազմակերպած մարզային հանրահավաքների ժամանակ մշտապես ԲՀԿ-ի կողքին է եղել:

Հիշեցնենք, երբ մարտի 5-ին Գագիկ Ծառուկյանը հայտարարեց կուսակցության նախագահի պաշտոնից հրաժարվելու մասին, ինչպես Սիսիանի քաղաքապետ Աղասի Հակոբջանյանը, այնպես էլ Գյումրիի, Աբովյանի, Նոր Հաճնի և Բյուրեղավանի քաղաքապետերը կուսակցությունից դուրս գալու դիմումներ ներկայացրեցին:

Ծառուկյանի գործոնով պայմանավորված` կուսակցությունը լքելը եւս մեկ անգամ փաստում է ԲՀԿ-ի՝ մարդ-կուսակցություն լինելը եւ գաղափարների բացակայությունը: