ԱԺ նախագահի ընտրության հարցում ՀՀԿ-ն կանգնել է իրավական կազուսի առաջ

ԱԺ նախագահի ընտրությունները կազմակերպելու հարցում առաջացել է իրավական կազուս, քանի որ ոչ իշխանական չորս ուժերը և ՕԵԿ-ը հրաժարվել են մասնակցել հաշվիչ հանձնաժողովի աշխատանքներին: Նշենք, որ ոչ իշխանական չորս ուժերը և ՕԵԿ-ը ԱԺ փոխխոսնակ Է. Շարմազանովի հետ աշխատանքային քննարկում են անցկացրել` քննարկելու հաշվիչ հանձնաժողովի ձևավորման հարցը:

«Ժառանգություն» խմբակցության ղեկավար Ռուբեն Հակոբյանը լրագրողների հետ զրույցում նշեց, որ կա խնդիր՝ հաշվիչ հանձնաժողովի հետ կապված, և հիմա Հանրապետական կուսակցությունը պետք է որոշի, թե այդ խնդիրն ինչպես պետք է լուծվի` ԱԺ կանոնակարգ օրենքի համաձայն, որովհետև վեց քաղաքական ուժերից հինգը հայտարարել են, որ չեն մասնակցելու հաշվիչ հանձնաժողովի աշխատանքներին:

Հարցին` մասնակցելո՞ւ է «Ժառանգությունը» ԱԺ նախագահի ընտրություններին, որովհետև ՀԱԿ-ն ու Դաշնակցությունը արդեն հայտարարել են, որ չեն մասնակցելու, Ռուբեն Հակոբյանը պատասխանեց. «Դինամիկ զարգացումների մեջ ենք, և կարող է ընդունված որոշումն անգամ փոփոխվի: Այս պահին այդ հարցը քննարկվում է, բայց դեռ վերջնական որոշում չունենք»: