Իրանական գազի գինը մեզ համար ձեռնտու չէ. Արմեն Մովսիսյան

ԱԺ նիստում կառավարությանն ուղղված հարցուպատասխանի ժամանակ ԱԺ «Ժառանգություն» խմբակցության ղեկավար Զարուհի Փոստանջյանը հարց ուղղեց ՀՀ էներգետիկայի եւ բնական պաշարների նախարարի Արմեն Մովսիսյանին` ասելով, որ երեկ Իրանի դեսպանը հայտնել է, որ Իրանը պատրաստ է վերականգնել Հայաստանի գազի սպառման ծավալները, սակայն դա կախված կլինի Հայաստանի իշխանություններից: «Ինչո՞ւ մինչև հիմա չկա այդ երկաթգիծը, և ինչո՞ւ չենք կարող Իրանից գազ ներկրել»,- հետաքրքրվեց պատգամավորը:

Էներգետիկայի նախարար Արմեն Մովսիսյանը նշեց, որ Իրանի դեսպանը մի քանի հայտարարություն է արել` երկաթուղու հետ կապված, որ մեկուկես միլիոն դոլարը տրվում է տեխնիկա-տնտեսական աշխատանքների համար:

Ըստ նախարարի` այդ աշխատանքներն ավարտված են, շուտով կներկայացվեն հանրությանը: Իրանական կողմն ամբողջ Իրանի տարածքում 160 կմ երկարությամբ երկաթգիծն իր բյուջեի հաշվին կառուցի, և եթե Հայաստանը համապատասխան միջոցներ ձեռնարկի և սկսի իր տարածում, իրենք էլ զուգահեռ կսկսեն շինարարությունն իրենց տարածքում: Գազի հետ կապված` նախարարը նշեց, որ Հայաստանի տեխնիկական հնարավորությունները  հնարավորություն են տալիս, որ անհրաժեշտ քանակությամբ գազ ներկրեն Իրանից:

«Բայց Իրանի դեսպանը մի բան էլ ասաց, որ` մենք գազը վաճառում ենք միջազգային գներով, որը շատ ավելի թանկ է, քան այն գինը, որ մենք ունենք Ռուսաստանից ներկրելիս: Այս առումով իրանական գազի գները մեզ համար ուղղակի ձեռնտու չեն: Ահա` ինչու Իրանից գազ չենք ներկրում»,- ասաց նա: