Դուք դեմ եք մեզ, այլ ոչ թե կուտակային համակարգին. ՀՀԿ պատգամավոր

Այսօր ԱԺ նիստում, երբ քննարկվում էր կենսաթոշակային համակարգի կուտակային բաղադրիչի հարցը, ԱԺ ՀՀԿ խմբակցության պատգամավոր Հակոբ Հակոբյանը նշեց, որ, 2010-ից սկսած, բոլորն ասում են` մենք չենք կարող բարձր թոշակ ունենալ, մեր պետությունը սոցիալական չէ, արդար չէ: Սակայն իշխանությունը փորձեց գնալ այն ճանապարհով, որ քաղաքացին շահագրգռված լինի իր աշխատանքով ապահովել իր կենսաթոշակը:

Նա նշեց, որ կառավարությունը նաև ժամանակ տվեց, որ հասարակությունը տեղեկանա նախ կամավոր բաղադրիչին, բայց այդ ընթացքում հասարակությունը ոչ միայն չտեղեկացավ, այլեւ, պատգամավորի խոսքով, մի քանի հոգի սկսեցին շահարկել այդ հարցը:

«Սա մի համակարգ է, որ զուգահեռ պետք է գնա մեր պետականության հետ, իսկ դուք եկել եք, վարչապետից եք խոսում: Բերեք ազնիվ լինենք` դուք ոչ թե կուտակային պարտադիր բաղադրիչին են դեմ, այլ դուք քաղաքական մեծամասնությանն եք դեմ, մեզ եք դեմ»,- ասաց Հակոբ Հակոբյանը:

Նա նշեց, որ տարիներ առաջ, երբ գործարկվում էր ԱՊՊԱ համակարգը, հազարավոր մարդիկ դեմ էին, իսկ հիմա գոհ են, այնպես որ` չկա մի բարեփոխում, որը չուղեկցվի խնդիրներով ու դեմ մարդկանցով: