Կուտակային ռեֆորմին կարող է դեմ լինել ոչ թե 80, այլ 100 տոկոսը. նախարար

«Ես չեմ ասել, որ Մաքսային միությանն անդամակցության շրջանակներում որոշ ապրանքների գնաճ է սպասվում, ես ասել եմ, որ գնաճ լինելու է հինգ տոկոսի չափով, ինչը հիմա էլ կա Հայաստանում: Իսկ ՀՀ նախագահն ասել է, որ բացառվում է գնաճի արտառոց բարձրացումը»,- լրագրողների հետ զրույցում ասաց ՀՀ էկոնոմիկայի նախարար Վահրամ Ավանեսյանը՝ պատասխանելով հարցին, թե ինչո՞ւ են հակասություններ նկատվում էկոնոմիկայի նախարարի ու ՀՀ նախագահի՝ գնաճի վերաբերյալ հայտարարություններում:

Նախարարը նշեց, որ չկա այնպիսի տեղեկատվություն, թե որևէ ապրանք արդեն թանկացել է, իսկ ներկայումս ընթանում են ակտիվ քննարկումներ` բոլոր գործարարների մասնակցությամբ, և ՄՄ ճանապարհային քարտեզի շրջանակներում ապրանքների մաքսատուրքերի վերաբերյալ ցուցակը կներկայացվի մեկ-երկու ամիս հետո:

Խոսելով կուտակային կենսաթոշակային ռեֆորմի վերաբերյալ ՀՀ նախագահի դիտարկումների մասին` Վահրամ Ավանեսյանը նշեց, որ ՀՀ նախագահի դիտարկումները հստակ էին: «Իհարկե, ես չգիտեմ, որ այդ ռեֆորմին քաղաքացիների 80 տոկոսը դեմ է, կարող է նման արձագանք լինել անգամ 100 տոկոսի կողմից, բայց բնական եմ համարում, որ դժգոհություններ կան որևէ բարեփոխումից, մանավանդ` կուտակային ռեֆորմից, որովհետև այն առաջարկում է այսօրվա սպառման փոխարեն սպառում ապագայում»,- ասաց նախարարը: