Զինծառայողների աշխատավարձն իբր բարձրանում է. Զարուհի Փոստանջյան

 Այսօր 2014թ. բյուջեի քննարկումների ժամանակ «Ժառանգություն» խմբակցության ղեկավար Զարուհի Փոստանջյանը հարց ուղղեց ԱԺ պաշտպանության, ներքին գործերի և անվտանգության հարցերի մշտական հանձնաժողովի նախագահ Կորյուն Նահապետյանին: Նա նշեց, որ հունվարի 1-ից զինծառայողների աշխատավարձը բարձրանալու է, սակայն երբ սկսի գործել պարտադիր կուտակային օրենքը, ապա 1974-ից հետո ծնված զինծառայողների աշխատավարձը ցածր կլինի, քանի որ նրանք նոր հարկատեսակ են վճարելու: «Ստացվում է, որ նրանց աշխատավարձը իբր թե բարձրանալու է: Ասեք, թե կոնկրետ որքա՞ն է  կազմելու նրանց աշխատավարձը»,- հարցրեց պատգամավորը:

Կորյուն Նահապետյանը նախ կարծիք հայտնեց, որ որոշ պատգամավորներ քաղաքական հարցադրումներ անելիս պետք է մի քիչ զգույշ մոտենան զինված ուժերի և երկրի անվտանգության հարցերին: «Ասում եք, թե այդ հավելումը չնչին է: Ես Ձեզ ընդառաջ քայլ չեմ անի` ասելով, թե այդ հավելումը չնչին է: Այդ հավելումը արվում է այն չափով, ինչ չափով, որ պետությունը հնարավորթյուն ունի»,- ասաց Կորյուն Նահապետյանը` հավելելով, որ ինքն անձամբ շատ կուզենար, որ զինծառայողների աշխատավարձի բարձրացումը շատ ավելին լիներ, քան կա: Նա խորհուրդ տվեց չմտածել, որ եթե պարտադիր կուտակային համակարգ են ներդնում, ուրեմն այդ զինծառայողների վիճակը ծանրանալու է: Նահապետյանը խորհուրդ տվեց Զարուհի Փոստանջյանին հանդես գալ առաջարկություններով, եթե ունի դժգոհություններ:

Արձագանքելով` Զարուհի Փոստանջյանը նշեց, որ երբ ամբիոնից խոսվում է երկրի մարտունակության մասին, ապա պետք է հիշել նաև թե' Շանթ Հարությունյանին, թե' ազատամարտիկ Վոլոդյա Ավետիսյանին, որովհետև նրանք էլ ժամանակին պաշտպանել են երկիրը: «Անարդարացի է զինծառայողների աշխատավարձի 10 տոկոս բարձրացում, եթե 200 տոկոսով բարձրանում է նախագահի աշխատավարձը: Պետք չէ թյուրիմացության մեջ գցել հենց զինծառայողներին»,- ասաց պատգամավորը:

Կորյուն Նահապետյանը նշեց, որ Զարուհի Փոստանջյանի գնահականները միշտ յուրօրինակ են, բայց չեն համապատասխանում իրականությանը: Նա խորհուրդ տվեց շրջահայաց լինել երկրի անվտանգության և զինված ուժերի մասին դատողություններ անելիս, միաժամանակ Փոստանջյանին խորհուրդ տվեց հաճախակի այցելել զորամասեր ու զրուցել զինվորների հետ, որովհետև միայն այդ դեպքում նա ճիշտ պատկերացում կունենա զինծառայողների վիճակի ու երկրի մարտունակության մասին: «Չեմ ուզում ոչ մեկի վաստակը թերագնահատել, բայց մարտական կենսագրությունը չի նշանակում, որ այդ մարդիկ կարող են կատարել հակաօրինական արարք»,- ասաց Կորյուն Նահապետյանը` անդրադառնալով Շանթ Հարությունյանին ու Վոլոդյա Ավետիսյանին: