Ռուսաստանի գուբերնատորը նվիրաբերեց ''Հայռուսգազարդը''. Զարուհի Փոստանջյան

Ռուսաստանը շարունակում է իր կայսերապաշտական նկրտումները նախկին խորհրդային միության երկրների նկատմամբ: Այս մասին լրագրողների հետ զրույցում ասաց ԱԺ «Ժառանգություն» խմբակցության ղեկավար Զարուհի Փոստանջյանը` խոսելով Պուտինի այցի և նրա հայտարարության մասին:

Նրա կարծիքով` այդ կայսերական նկրտումները և Ռուսաստանի տնտեսության վատթարացումը վատ են անդրադառնալու ոչ միայն Հայաստանի, այլ նաև Ռուսաստանի ժողովրդի վրա: Պուտինը Հայաստանին վերաբերվում է որպես ֆորպոստի:

«Հայռուսգազարդի» վաճառքը Ռուսաստանի գուբերնատորի պաշտոնը ստանձնած Սերժ Սարգսյանի կողմից իր պաշտոնը երկարացնելու նպատակով արված նվիրաբերություն էր»,- ասաց Զարուհի Փոստանջյանը` հավելելով, որ այս պահի դրությամբ փաստ է, որ Հայաստանը վաճառում է այն, ինչ ունի: Նրա համոզմամբ` Հայաստանի իշխանություններին ու նախագահին նշանակել է հենց Ռուսաստանը:

Զարուհի Փոստանջյանը նշեց, որ ռուս ժողովրդի հետ հայ ժողովուրդը կարող է լինել բարեկամ, սակայն խնդիրն այն է, որ Ռուսաստանի իշխանությունը ներկայացնում է ոչ թե ռուս ժողովրդի շահերը, այլ մի խմբակի, որն ունի կայսերական նկրտումներ:

Ապագայի կանխատեսումների հետ կապված` պատգամավորը կարծիք հայտնեց, որ հայ հասարակությունն իր մեջ ուժ և բանաձև կգտնի, որը դուրս կբերի նրան այս վիճակից: