Կիրո Մանոյանը` մոլդովացի օմբուդսմենի մասին

Երեկ Մոլդովայի խորհրդարանի նախագահ Իգոր Կորմանը, քննադատելով Մոլդովայի խորհրդարանական փաստաբան Աուրելիա Գրիգորիուի` Հայաստանի խորհրդարանում արած  սկանդալային հայտարարությանը, նշել էր, որ նա վնաս է հասցրել երկրի վարկանիշին: Չնայած խորհրդարանի նախագահի և որոշ մոլդովացի պատգամավորների քննադատություններին` Գրիգորիուն չի ընդունում իր սխալը. մոլդովական հեռուստաընկերություններից մեկի  հաղորդման ժամանակ նա ոչ միայն պնդել է  Հայաստանում արած հայտարարությունները, այլև նշել,  որ իր ելույթը համաձայնեցված է եղել կազմակերպիչների հետ:

Մոլդովացի օմբուդսմենի պահվածքի վերաբերյալ  yerkir.am-ն այսօր մեկնաբանություն խնդրեց  ՀՅԴ Բյուրոյի Հայ դատի և քաղաքական հարցերի գրաենյակի ղեկավար Կիրո Մանոյանից:

«Եթե մենք միամիտ լինեինք, կասեինք, որ այդ կինը  համոզված է իր ասածի մեջ, բայց մենք իրատես ենք և գիտենք նրա պահվածքի պատճառը»,- ասաց նա և հավելեց, որ նույն բանը հակառակ իմաստով մեկ ուրիշը չէր համարձակվի հայտարարել Ադրբեջանում:

Ըստ Մանոյանի` կարևորն այն էր, որ հանդիպմանը մասնակից եվրոպական պետությունների ներկայացուցիչները տեսան այն հիմնական տարբերությունը, որը նման հարցերում  առկա է Հայաստանի և Ադրբեջանի միջև: «Մենք չենք ասում, որ Հայաստանում ամեն ինչ սքանչելի է, բայց նման հարցերում պարզ է, որ մեր երկրի ու Ադրբեջանի տարբերությունը մեծ է»,- ասաց նա:

Մանոյանի խոսքով` կարելի է անգամ շնորհակալ լինել այդ կնոջը, ով փաստեց, որ Հայաստանում կարող է նման հայտարարություն անել և ապահով մնալ, բայց ոչ ոք չի համարձակվի  Ադրբեջանի դեմ նման բան ասել այդ երկրում:

«Այնքան նրա խոսելը չէր կարևորը, որքան ներկաներից ոմանց ձայնակցելը»,- ասաց նա և հավելեց. «Այս ամենը ցույց է տալիս, որ Ադրբեջանն իր ֆինանսական ներգործությամբ կարողացել է ազդել անգամ իրավական դաշտի մարդկանց վրա»: