Խնդիրը կա, բայց խնդրին մոտենալու ձևը սխալ է. Կիրո Մանոյանը՝ Էրեբունիում կատարվող դեպքերի մասին

Այսօր լրագրողների հետ հանդիպման ժամանակ  ՀՅԴ Բյուրոյի Հայ Դատի և քաղաքական հարցերի գրասենյակի պատասխանատու Կիրո Մանոյանն անդրադարձել է Էրեբունու ոստիկանական բաժանմունքի վրա զինված հարձակման դեպքին: Հարցին, թե ինչպես է գնահատում կատարվածը, Կիրո Մանոյանը նշեց, որ Դաշնակցության հայաստանյան ԳՄ ներիկայացուցիչը երեկ արդեն հրապարակել է կուսակցության դիրքորոշումը, ասելով, որ նման միջոցները ՀՅԴ-ի համար ընդունելի չեն անհրաժեշտ փոփոխությունները երկրում իրականացնելու համար: Ըստ Մանոյանի,  արտաքին քաղաքականության  տեսանկյունից այդ միջադեպը երկրի համար վատ հետևանքներ ունի, և կշարունակի ունենալ, եթե ամենը ավարտվի նոր զոհերով: Կիրո Մանոյանի խոսքով` ամեն ինչն էլ մտահոգիչ է:

Իսկ թե ինչ հետևանքներ կունենա ստեղծված իրավիճակը, Կիրո Մանոյանի կարծիքով հետևանքների մասին պատկերացումներն էլ հստակ չեն, որովհետև հստակ է այն, որ հասարակության մեջ կա դժգոհություն իշխանությունների նկատմամբ, միաժամանակ հասարակության արձագանքից պարզ է դառնում, որ հասարակությունը չի կիսում այս ձևով հարցեր լուծելու մոտեցումը:

«Հասարակությունը պետք է կազմակերպված լինի, որ կարողան ազդել երկրում փոփոխություններ կատարելու վրա, որպեսզի մարդիկ ստիպված չլինեն գնալ նման ծայրահեղ միջոցների: Այս միջոցը արդարացված չէ, այսինքն խնդիրը կա, բայց խնդրին մոտենալու ձևը սխալ է»,- ասաց Կիրո Մանոյանը: