Մայաների բուրգը քանդել են հանուն... խճի արդյունահանման

Բելիզում քանդել են մայաների խոշորագույն բուրգը` այդ տեղում ավտոճանապարհի շինարարության համար խիճ արդյունահանելու նպատակով. տեղեկացնում է Foxnews-ը:

2300-ամյա բուրգը գտնվել է մասնավոր տարածքում, սակայն Բելիզի օրենքներն իրենց պաշտպանության տակ են առնում բոլոր կառույցները, որոնք գոյություն են ունեցել իսպանացիների նվաճումից առաջ:

«Մենք արդեն չենք կարող վերադարձնել բուրգը: Ես սարսափած եմ եւ պարզապես ասելիք չունեմ»,- ասել է  Բելիզի Հնագիտության ինստիտուտի մասնագետ Ջոն Մորիսը:

Բուրգը ոչնչացրած տեխնիկան պատկանել է D-Mar General Contracting and Development, Inc. շինարարական ընկերությանը, որի սեփականատեր Դենի Գրիջալվան 7newsbeilze կայքին ասել է, թե տեղյակ չէ, որ բուրգի տեղում խիճ է արդյունահանվելու: Նա խորհուրդ է տվել հարցերով դիմել նախագծի ղեկավարին, ով, իր հերթին, հրաժարվել է մեկնաբանություններից: