Արիության դասեր` Արցախի ուսանողների համար

Մայիսյան եռատոնին նվիրված միջոցառումների շրջանակներում երեկ Արցախում կազմակերպվել են արիության դասեր, ինչպես հանրակրթական, այնպես էլ միջին մասնագիտական և բարձրագույն ուսումնական հաստատություններում:

Արցախի մայր ԲՈՒՀ-ում ավանդաբար արիության դասը վարել են ԼՂՀ պաշտպանության նախարար, ՊԲ հրամանատար, գեներալ-լեյտենանտ Մովսես Հակոբյանն ու կրթության և գիտության նախարար Սլավա Ասրյանը:

ՊԲ հրամանատարը խոսել է Հայրենական մեծ պատերազմում տարած հաղթանակի, Շուշիի ազատագրման և Պաշտպանության բանակի օրվա առանձնահատուկ նշանակության մասին՝ նշելով, որ անհրաժեշտ է, որպեսզի ներկա ու հաջորդ սերունդները շարունակեն հավատարիմ մնալ այդ արժեքներին և ունենան կամք ու վճռականություն դրանց տեր կանգնելու համար:

Մովսես Հակոբյանը համալսարանականներին վստահեցրել է, որ Պաշտպանության բանակն այսօր ունի համապատասխան ներուժ Արցախի Հանրապետության պաշտպանությունը լիարժեք իրականացնելու համար` իհարկե, ապավինելով հասարակության յուրաքանչյուր անդամի, այդ թվում` նաև ուսանողության աջակցությանը:

Վերջում ՊԲ հրամանատարը համալսարանի ռեկտորին և գրադարանին հանձնել է բանակի մասին պատմող աշխատություններ: