ՀԱԿ-ը պատրաստ է ագրեսիվ ընտրարշավի

ՀԱԿ համակարգող Լևոն Զուրաբյանն այսօր լրագրողների հետ հանդիպման ժամանակ, անդրադառնալով ՀԱԿ կուսակցությանը, նշեց, որ, իրենց միացած կուսակցություններից զատ, ՀԱԿ-ին անդամագրվել են նաև ավելի քան 2000 անկուսակցականներ:

Պատգամավորի խոսքով `մարդկային ռեսուրսների առումով ՀԱԿ-ն այսօր շատ ավելի հզոր է, քան երբևէ:

«ՀԱԿ-ը պատրաստ է մարտի, պատրաստ է ագրեսիվ ընտրարշավի» ,- անդրադառնալով ավագանու ընտրություններին`  հայտարարեց նա: Զուրաբյանի խոսքով` իրենք ավագանու ընտրությունների ընթացքում ընտրակեղծիքների դեմ պայքարելու համար բանակցել են թե' ԲՀԿ-ի, թե' Դաշնակցության հետ, իսկ «Ժառանգության» հետ` ունեցել բանակցությունների 4 ռաունդ:

«Մի բան հաստատ է, մենք տեղամասերում փորձելու ենք միասնաբար պահել ժողովրդի ձայնը»,- նշեց նա և հավելեց, որ եթե իրենց հաջողվի ապահովել, որպեսզի ՀՀԿ-ն անգամ 40% քվե չհավաքի, կոալիցիա կկազմեն և քաղաքապետարանը կվերցնեն իշխանությունների ձեռքից:

Իսկ ընդհանրապես Տարոն Մարգարյանի ղեկավարած ներկայիս քաղաքապետարանը, ըստ Զուրաբյանի, մի քանի օլիգարխների շահերի սպասարկման գործիք է:

Բանախոսը խորհուրդ տվեց նաև զատել իրական ընդդիմությունը կեղծից: Իսկ վերջում հայտարարեց , որ ՀԱԿ-ը պատրաստվում է ապրիլի 30-ին համապետական հանրահավաք կազմակերպել Ազատության հրապարակում: