Կոչ եմ անում բոլոր թեկնածուներին ընտրարշավի ընթացքում միմյանց նկատմամբ ցուցաբերել պարկեշտ ու հարգալից վերաբերմունք. Արթուր Խաչատրյան

ՀՅԴ ցուցակի երրորդ տեղը ներկայացնող Արթուր Խաչատրյանը իր ֆեյսբուքյան էջում գրել է.

«Սիրելի՛ բարեկամներ,

Դեկտեմբերին կայանալիք արտահերթ խորհրդարանական ընտրություններին ՀՅԴ համապետական ցանկում 3-րդ համարն եմ: Շնորհակալ եմ կուսակցությանն իմ անցած ուղին բարձր գնահատելու համար: Հուսամ, կարժանանամ նաև ընտրողների համարժեք վերաբերմունքին:

Նաև, ռեյտինգային թեկնածու եմ Երևանի թիվ 2 ընտրատարածքում (Արաբկիր, Աջափնյակ և Դավիթաշեն թաղամասեր): Օրենքով սահմանված ժամկետում կբացեմ իմ նախընտրական շտաբը և դրա մասին պատշաճ կերպով կտեղեկացնեմ: Երախտապարտ կլինեմ ցանկացած աջակցության համար՝ ներառյալ քննադատության:

Թերևս համապետական ցանկում 3-րդ տեղի պարագան էր, որ չառաջադրվեցի ինձ համար հարազատ դարձած Շիրակի մարզում: Պատասխանատվություն ունեմ ոչ միայն «իմ» ընտրատարածքի, այլև ամբողջ քարոզարշավի համար:

Վստահ եմ, որ այս ընտրություններն անկյունաքարային են լինելու մեր պետականաշինության հարցում: Կոչ եմ անում բոլոր թեկնածուներին ընտրարշավի ընթացքում միմյանց նկատմամբ ցուցաբերել պարկեշտ ու հարգալից վերաբերմունք: Վերջապես, ընտրություններից հետո էլ կյանք կա, փողոցում հանդիպելիս պետք է կարողանանք իրար աչքերի մեջ նայել»,- գրել է նա: