Ցանկանում են վերջ դնել Արցախի ժողովրդի մեկուսացմանը

Լեռնային Ղարաբաղ անվանումը հավանորեն մեր համաքաղաքացիներից շատերին ոչինչ չի ասի, սակայն այնտեղ 25 տարի առաջ ծնվեց ժողովրդական շարժում, ազատության եւ հույսի շարժում, որը հանգեցրեց նախկին ԽՍՀՄ-ի փլուզմանը. Le Huffington Post թերթում գրել է Ֆրանսիայի Ազգային ժողովի պատգամավոր Ֆրանսուա Ռոշբլուանը (http://www.huffingtonpost.fr/francois-rochebloine/haut-karabagh-armenie_b_3021584.html):

Ըստ նրա` այդ պահից ի վեր Լեռնային Ղարաբաղը շատ բաների միջով է անցել` անկախության համար մղվող ծանրագույն պատերազմից, որը ձգվեց մինչեւ 1994-ը եւ հազարավոր մարդկանց կյանք խլեց, մինչեւ նոր պետության ստեղծումը, որն ավելի ժողովրդավարական է, քան նրա հարեւանները: Այնուհետեւ Ռոշբլուանն ընդգծում է, որ թեեւ ԼՂ-ն ազատություն ձեռք բերեց, սակայն ամբողջ տարածաշրջանին հարկավոր է խաղաղություն` հետագա զարգացման համար: Այդ նպատակով էլ ստեղծվել է ԵԱՀԿ Մինսկի խումբը, որում Ֆրանսիան ԱՄՆ-ի եւ Ռուսատսնաի հետ համանախագահ է:

«Դա մեծ պատասխանատվություն է, քանի որ մենք գիտենք, որ տնտեսական եւ հումանտար զարգացման կայունությունն ու անվտանգությունն անհնար են, քանի դեռ տարածաշրջանում տիրում է անվստահությունը. երկխոսությունն առաջին պլան չի մղվի, իսկ ԼՂ-ում ժողովրդավարական շինարարությունը ոգեշնչման աղբյուր չի դառնա հարեւան ազգերի համար, որոնք նույնպես ձգտում են ազատության եւ համաձայն չեն ատելությամբ լեցուն հռետորության հետ:

Մինսկի խմբի աշխատանքներին աջակցելու, Ֆրանսիայի դիրքորոշումը հնչեցնելու եւ տարածաշրջանում ժողովրդավարության անցումային գործընթացին զարկ տալու նպատակով մենք` ֆրանսիական ամենատարբեր քաղաքական ուժերի ներկայացուցիչներս, որոշում ընդունեցինք Լեռնային Ղարաբաղի Հանրապետության հետ բարեկամության շրջանակ ստեղծելու մասին: Այն բաց է բարի կամքի տեր բոլոր մարդկանց համար, այսինքն` բոլոր քաղաքական գործիչների, ովքեր համոզված են, որ միջազգային արդարության եւ տարածաշրջանային անվտանգության ամենալավ երաշխիքը ժողովուրդների ինքնորոշման անկապտելի իրավունքն է: Այդ ազնիվ գործում մենք միայնակ չենք, եւ մեր տեսակետն ավելի մեծ աջակցություն է ստանում:... Լիտվական խորհրդրանում Լեռնային Ղարաբաղի հետ բարեկամության խմբի ստեղծումը (մենք ջերմորեն ողջունում ենք այդ նախաձեռնությունը) վկայում է այդ նոր ժողովրդավարության նկատմամբ միջազգային հանրության համակրանքի մասին:

... Մենք ցանկանում ենք վերջ տալ մեկուսացմանը, որում արդեն 22 տարի գտնվում է Լեռնային Ղարաբաղի ժողովուրդը, եւ դարձել նրան, այլ ազգերին հավասար, զարգացման տարածաշրջանային նախագծերի մաս: Մենք համոզված ենք, որ  այդ նպատակներին հասնել անհնար է առանց երկխոսության, վստահության վերականգման, արդարության ու ժողովրդավարության արժեքների տարածման: Հուսանք, որ Ֆրանսիան Կովկասին խաղաղություն ու նոր հույս կբերի»,- գրել է Ռոշբլուանը: