ԱԺ խմբակցությունները երախտագիտություն են հայտնում Լիտվայի Սեյմասի պատգամավորներին

Լիտվայի Սեյմասում Լիտվայի Հանրապետության և Արցախի Հանրապետության բարեկամության խմբի ստեղծման կապակցությամբ ՀՀ ԱԺ խմբակցությունների հայտարարությունը

Հայաստանի Հանրապետության Ազգային ժողովի քաղաքական բոլոր խմբակցությունները ողջունում են Լիտվայի Սեյմասում Լիտվայի Հանրապետություն-Արցախի Հանրապետություն բարեկամության խմբի ստեղծումը: Նախադեպը չունեցող լիտվացի խորհրդարանականների պատմական այս քայլը մարդասիրության, բարեկամության, ժողովրդավարության և ազատության վեհ արժեքներին Լիտվայի ժողովրդի անվեհեր նվիրվածության, ինչպես նաև միջազգային հանրության կողմից Լեռնային Ղարաբաղի ժողովրդին երկխոսության մեջ ներգրավելու նոր կարևոր հանգրվանի սկզբնավորման վկայությունն է:

25 տարի առաջ Լիտվայի և Հայաստանի ժողովուրդների բարեկամությունը, զորակցությունն ու միասնականությունը ճանապարհ հարթեցին մեր պետականությունների վերականգնման համար: Հայ ժողովրդի պատմության մեջ Լիտվան հավերժական տեղ է զբաղեցրել որպես մեր նորանկախ հանրապետությունը ճանաչած առաջին երկիր: Հատկանշական է և միևնույն ժամանակ բնական, որ այսօր էլ նույնպես, ինչպես մեր անկախության ձեռքբերման ճակատագրական օրերին, հենց Լիտվայի ներկայացուցիչները առաջինը կատարեցին նման արժանապատիվ և խիզախ քայլը:

Մենք մեր երախտագիտությունը, գնահատանքն ու զորակցությունն ենք հայտնում մեր լիտվացի գործընկերներին, վստահ լինելով, որ Լիտվան` որպես կայացած ժողովրդավարական պետություն, չի ընկրկի բարեկամության և խաղաղ գոյակցության դեմ այս օրերին ծավալված  և տարակուսանք առաջացնող անբնական ճնշումներին և Ադրբեջանից եկող հիստերիկ արձագանքներին:  Լիահույս ենք, որ Սեյմասի անդմաների նախաձեռնությանը կմիանան համամարդկային սկզբունքներին, մարդու հիմնարար ազատություններին, համերաշխության և խաղաղության հաստատման հավատարիմ լիտվացի այլ խորհրդարանականներ, իսկ ժողովրդավար այլ  երկրների օրենսդիր մարմիններում  այս նախաձեռնությունը կոստանա նոր դրսևորումներ:

 Արցախը սկսում է դիտվել միջազգային ասպարեզում որպես քաղաքականության ինքնուրույն գործոն. այդ մասին են վկայում  ԱՄՆ և Ավստրալիայի որոշ նահանգների կողմից Արցախի անկախության ճանաչման փաստերը, Ուրուգվայի խորհրդարանական պատվիրակության պաշտոնական այցը  ԼՂՀ և այլն: Լիտվացի պատգամավորների կողմից Արցախի հետ բարեկամության խմբի ստեղծումը ևս մեկ քայլ է այդ ճանապարհին:

ՀՀԿ խմբակցության ղեկավար Գալուստ Սահակյան

ԲՀԿ խմբակցության ղեկավար Գագիկ Ծառուկյան

ՀԱԿ խմբակցության ղեկավար Լևոն Զուրաբյան

ՕԵԿ խմբակցության ղեկավար Հեղինե Բիշարյան

ՀՅԴ խմբակցության ղեկավար Արմեն Ռուստամյան

«Ժառանգություն» խմբակցության ղեկավար Ռուբիկ Հակոբյան