Արգենտինայի հայ համայնքը Ցեղասպանության ճանաչման համար երախտագիտություն է հայտնել երկրի իշխանություններին

Արգենտինայի հայ համայնքը երախտագիտություն է հայտնել երկրի իշխանություններին 8 տարի առաջ հունվարի 11-ին Հայոց ցեղասպանությունը պաշտոնապես ճանաչելու համար. տեղեկացնում է Aztagdaily-ն:

Այդ կապակցությամբ ՀՅԴ Հայ դատի Հարավային Ամերիկայի հանձնախումբը հանդես է եկել հայտարարությամբ:

Հայտարարության մեջ նշվել է, որ Հայոց ցեղասպանությունը մարդկության դեմ հանցանք էր, և ճանաչելով ցեղասպանությունը` Արգենտինան ճակատագրական քայլ է կատարել՝ բարձր դասելով պատմական ճշմարտությունն ու արդարությունը, տուրք չտալով քաղաքական, տնտեսական ճնշումներին ու շահարկումներին:

2007 թվականի հունվարի 11-ին Արգենտինան ընդունեց թիվ 26199 օրենքը, որի համաձայն` 1915-1922 թվականներին Արեւմտահայաստանի հայերի տեղահանությունն ու կոտորածը ճանաչվեց որպես ցեղասպանություն: Օրենքը շեշտում է, որ այդ տարիներին զոհվել է ավելի քան 1.5 միլիոն հայ: Միաժամանակ, ապրիլի 24-ը Արգենտինայում ճանաչվել է իբրև Ազգերի միջև համերաշխության և հարգանքի օր: