Քաղաքական ''կլոունադա''. Զոհրաբյանը` Հայրիկյանի պահվածքի մասին

Արդեն տեղեկացրել ենք, որ նախագահի թեկնածու Պարույր Հայրիկյանը ՍԴ-ից հետ է վերցրել երեկ տված իր  դիմումը` ընտրությունները երկու շաբաթով հետաձգելու պահանջով: Թե ինչո՞ւ է դիմել այս քայլին, Հայրիկյանը դեռեւս որեւէ լուրջ, հիմնավորված պատասխան չի տվել: Ուշագրավ է, որ երեկ նա ասում էր, որ դիմումը կվերցնի միայն այն դեպքում, եթե ձեւավորվի միասնական թեկնածու, ինչն, ըստ էության, չեղավ եւ դժվար էլ լինի:

Yerkir.am-ի հետ զրույցում ԱԺ ԲՀԿ խմբակցության քարտուղար Նաիրա Զոհրաբյանն անդրադարձավ Հայրիկյանի` առնվազն տարօրինակ պահվածքին:

«Ես կրկես, իհարկե, սիրում եմ, բայց երբ այդ կրկեսը լինում է իր բնական վիճակով: Քաղաքական կրկես եւ քաղաքական կլոունադան բացարձակապես իմ սիրած ժանրը չեն, ուստի, հարգանք ունենալով Պարույր Հայրիկյանի անցյալի հանդեպ եւ չցանկանալով կոտրել այն, որ երեւի կա կամ չկա հանրության ինչ-որ հատվածի մոտ նրա անձի նկատմամբ, ես ուղղակի ձեռնպահ կմնամ քաղաքական այս հարցը մեկնաբանելուց»,- հայտարարեց Նաիրա Զոհրաբյանը:

Դիտարկմանն ի պատասխան, թե, ոմանց կարծիքով, սա Հայրիկյանի եւ իշխանությունների միջեւ գործարքի արդյունք է, նա նշեց, որ գործընթացն այնքան «կլոունադայի» վերածվեց, որ անգամ գործարքի հոտ չի գալիս:

ԱԺ ԲՀԿ խմբակցության քարտուղարը եւս մեկ անգամ ընդգծեց, որ, հաշվի առնելով Հայրիկյանի անցյալը, չի ցանկանում գնահատականներ տալ նրա ներկայիս քայլերին: