Գաղտնի է, թե որքան գումար է ծախսվել ՀՀԿ գրասենյակի վերանորոգման համար

2010թ. սեպտեմբերի 22-ին Հանրապետական կուսակցության կենտրոնական գրասենյակի շենքի տանիքը հերթական անգամ այրվեց: Առաջին անգամ շենքում հրդեհ էր բռնկվել մայիսի 22-ին, ինչի հետևանքով հրդեհվել էին գրասենյակի տանիքը և երկրորդ հարկը: Այսօր ՀՀԿ շենքն ամբողջությամբ, լուրջ ձևափոխումներով վերանորոգված է. գրում է «Ժողովուրդը»:

Թերթն արդեն տևական ժամանակ է` փորձում է պարզել, թե որքան գումար է ծախսել ՀՀԿ-ն նոր շենքի վերանորոգման համար, բայց իշխող կուսակցության ներկայացուցիչները, մեկը մյուսի վրա գցելով, չեն ցանկանում հայտնել այդ տեղեկությունը:

ՀՀԿ մամլո խոսնակ Էդուարդ Շարմազանովը թերթի հետ զրույցում նշել է, թե դա իր գործը չէ. «Դրա հետ ես ի՞նչ կապ ունեմ, դիմեք ՀՀԿ կազմակերպչական գործերի ղեկավար Ռուբիկ Թադևոսյանին»:

Իսկ Ռ. Թադևոսյանն էլ թերթի հետ զրույցում նշել է, որ ինքը տեղյակ չէ: Հետաքրքիր է, թե ինչո՞ւ է ՀՀԿ-ն գաղտնի պահում ծախսված գումարների չափը: