ՉՈՐՐՈՐԴ ԻՆՔՆԻՇԽԱՆՈՒԹՅՈՒՆ. Դատավարությանն ընդառաջ

Թերթն օրերս նամակով դիմել էր ՀՀ պետական եկամուտների կոմիտեի լրատվական ծառայությանը` խնդրելով տրամադրել տեղեկություններ, թե ինչ հարկային պարտավորություններ ունի գործարար Միկա Բաղդասարովին պատկանող «Արմավիա» ընկերությունը պետության նկատմամբ: Թերթը ՊԵԿ-ից խնդրել էր տվյալներ տրամադրել նաեւ «Արմավիայի» մաքսային վճարումների կտրվածքով:

Բնականաբար, թերթն այդպես էլ պատասխան չստացավ ՊԵԿ-ից: Այս լռության պարագայում թերթը որոշել է հրապարակել այն, ինչ իրեն հայտնի է Բաղդասարովի բիզնեսի մասին: Եվ այսպես, թերթի տեղեկություններով, Միկա Բաղդասարովին պատկանող «Արմավիա» ընկերությունը պետությանը պարտք է շուրջ հինգ միլիարդ ՀՀ դրամ` հարկերի եւ մաքսային վճարումների տեսքով: Թե ինչպես են առաջացել այս պարտքերը, եւ ինչպես է ՀՀ իշխանությունը հանդուժում, որ այս գործարարը բյուջեին պարտք մնա միլիարդներ, մեզ չի հետաքրքրում: Ճիշտ կլիներ դրանով հետաքրքրված լինեին ՀՀ իրավապահ մարմինները:

Թերթը Բաղդասարովին հորդորում է վճարել պարտքերը, այլ ոչ թե, օրինակ, թերթին դատի տալ արտատպման համար եւ պահանջել երկու միլիոն ՀՀ դրամ: Բոլոր դեպքերում թերթը պատրաստ է դատարանում ապացուցել, որ Բաղդասարովի հայցն ընդդեմ թերթի ծայրից ծայր ապատեղեկատվություն է: