Ընդդեմ պահպանողականության

ԱՄՆ Յուտա նահանգի հազարավոր բնակիչներ անցած հանգստյան օրերին զավեշտալի բողոքի ակցիա են կազմակերպել ընդդեմ նահանգի պահպանողական օրենքների. նրանք ներքնազգեստով վազքի են դուրս եկել Սոլթ Լեյկ Սիթիի փողոցներով. տեղեկացնում է ИТАР-ТАСС-ը:

Յուտան մորմոնների նահանգ է, բնակչության մեծ մասը «Վերջին օրերի սրբերի եկեղեցու» հետեւորդներ են: Նահանգում արգելված են մոլի խաղերը, խիստ սահմանափակ է ալկոհոլի վաճառքը, չեն ողջունվում միասեռական կապերն ու ամուսնությունները:

Ակցիայի նպատակն է եղել միավորել նահանգի այն բնակիչներին, ովքեր այդ օրենքները չափազանց խիստ են համարում: Ակցիայի մասնակիցներին արգելվել է լրիվ մերկ վազել եւ խորհուրդ է տրվել ակցիան իրականացնել գիշերով: Վազողներն իրենց հագուստից ազատվել են մեկնարկի ժամանակ` դրանք նվիրաբերելով անտուններին:

Ըստ կազմակերպիչների` Facebook-ում վազքին մասնակցելու մտադրություն է հայտնել 12 հազար մարդ, սակայն իրենց խոստումը կատարել են ավելի քան 3 հազարը: