Որ պատից կախված զենքը մի օր չկրակի

Ոստիկանության Երեւան քաղաքի վարչության հերթապահ մաս հուլիսի 26-ին անհայտ քաղաքացուց հաղորդում է ստացվել, որ Հալաբյան փողոցից Հրազդանի կիրճ տանող ճանապարհին` փոքր կամրջի տակ, զենք-զինամթերք է թողնում:

Ոստիկանության մամուլի ծառայությունից հայտնում են, որ մեկնած օպերատիվ խումբը նշված վայրում պոլիէթիլենային պարկում հայտնաբերել է թմբուկավոր  ատրճանակ, մեկնարկային  ատրճանակ, «F-1» տիպի  նռնակ,  նռնակի 2 պայթուցիչ, «AKS» ինքնաձիգի  պահունակ, գնդացրի 2 ժապավեն եւ տարբեր տրամաչափի 172 փամփուշտ:

Նույն օրը անհայտ քաղաքացուց ոստիկանության Չարբախի բաժանմունք ահազանգ է ստացվել, որ զենք-զինամթերք է թողնում Արարատյան փողոցի թիվ 90 հասցեում գտնվող կամրջի տակ:

Մեկնած օպերատիվ խումբը նշված վայրում հայտնաբերել է «ՏՕԶ» տիպի 5,6 մմ տրամաչափի հրացան, «Ֆ-1» տիպի  նռնակ` առանց պայթուցիչի եւ «ՈւԶՌԳ» տիպի  պայթուցիչ:

Բացի այդ` հուլիսի 26-ին ոստիկանության Նոր Նորքի բաժին է ներկայացել ԵԿՄ անդամ, ԼՂՀ  ինքնապաշպանական մարտերի մասնակից 54-ամյա Աբրահամ Կ.-ն եւ կամավոր հանձնել ինքնաշեն  հրացան եւ տարբեր տրամաչափի 146 փամփուշտներ` հայտարարելով, որ հանձնված զենքն-զինամթերքը նույն օրը` ժամը 09.30-ին, պատահաբար հայտնաբերել է իրենց շենքի խորդանոցում, մաքրման աշխատանքներ կատարելիս եւ մտաբերել է, որ դրանք իր հետ բերել է դեռեւս 1990-1993 թթ. ԼՂՀ ինքնապաշտպանական մարտերին մասնակցելու ընթացքում եւ մոռացել է դրանց գոյության մասին:

Նույն օրը ոստիկանության Վայքի բաժին է ներկայացել 45-ամյա Մարկոս Հ.-ն,  կամավոր հանձնել  տարբեր տրամաչափի 87 փամփուշտ եւ հայտարարել, որ  նշված զինամթերքը ձեռք է բերել 1990-1992 թթ. Բարձրունի գյուղի ինքնապաշտպանական մարտերին մասնակցելու ժամանակ:

Բոլոր դեպքերում ներկայացված եւ հայտնաբերված զենք-զինամթերքն ուղարկվել է փորձաքննությունների: