Մենք պետք է մեզնից կախված ամեն ինչ անենք լուծումների գնալու համար, բայց դա միայն մեզնից չի կախված. Նիկոլ Փաշինյան

2022-ին պետք է բոլոր ջանքերը ներդնենք, որ  վերելքի ու վերածննդի տարի լինի: Այս մասին այսօր՝ դեկտեմբերի 30-ին, կառավարության նիստում հայտարարեց վարչապետ Նիկոլ Փաշինյանը:

«Սա  է այսօրվա հիմնական ուղերձը: Պարզ է, որ հետպատերազմյան  օրակարգը եւ հետեւանքները դեռ երկար են իրենց զգացնել տալու, պետք է քայլ առ քայլ հաղթահարենք այդ վիճակը, փորձենք լուծել բոլոր եղած խնդիրները, որոնք կան արտաքին օրակարգում: 

Իմ համոզմունքը հետեւյալն է, որ մենք պետք է մեզնից կախված ամեն ինչ անենք լուծումների գնալու  համար: Մենք պետք է մեզնից հնարավորը անենք, որ հաջորդ սերունդներին եւ հաջորդ կառավարություններից ոչ թե  շարունակաբար բարդացող խնդիրներ ժառանգենք, այլ ժառանգենք կայուն, ամրագրված իրավիճակ, ինչը առանցքային նախապայման է երկրի հետագա բնականոն զարգացման համար:

Մյուս կողմից՝ պետք է հասկանանք, որ սա հեշտ չէ: Ինչքան էլ մեր պատրաստակամությունը մեծ է՝ վերցնել պատասխանատվություն եւ որոշումներ կայացնել, պետք է արձանագրենք, որ այդ որոշումների  կայացումը գրեթե միշտ միայն մեզնից չի կախված:

Մենք պետք է կարողանանք մեր արտաքին քաղաքականությամբ նաեւ բոլոր այն սուբյեկտներին, ումից կախված է նաեւ որոշումների կայացումը, հասունանցնեք մի այնպիսի գործընթաց, որտեղ մենք ի վերջո, կարողանանք ֆիքսել իրավիճակը, տարածաշրջանի համար խաղաղ դարաշրջան բացելու մեր օրակարգը կարողանանք հասցնել լրումի: Սա բարդ գործընթաց է»,-ասաց նա: