ՀՀ վարչապետն այցելել է Ռոստովի մարզի Չալթր հայկական գյուղը

Դոնի Ռոստով կատարած աշխատանքային այցի շրջանակներում Հայաստանի վարչապետ Տիգրան Սարգսյանը երեկ երեկոյան այցելել է Ռոստովի մարզի Մյասնիկյանի շրջանի Չալթր հայկական գյուղ:

Չալթրի հայկական համայնքը մեծ խանդավառությամբ է դիմավորել նրան. տեղեկացնում է ՀՀ կառավարության տեղեկատվության եւ հասարակայնության հետ կապերի վարչությունը:

Վարչապետը ծանոթացել է տեղի հայության գործունեությանը, կենցաղին, պատմությանը: Նա այցելել է Չալթրի Սուրբ Համբարձում եկեղեցի, ապա ծաղիկներ դրել եկեղեցու բակում կանգնեցված հայ ժողովրդի` պատմության ընթացքում տված բազմաթիվ զոհերին նվիրված խաչքարին, ինչպես նաև Հայրենական մեծ պատերազմի զոհերի հիշատակը հավերժացնող հուշահամալիրին:

Այնուհետև Տ. Սարգսյանը եղել է Չալթրի պատմաազգագրական թանգարանում, ծանոթացել ներկայացված ցուցանմուշներին:

Ռոստովի մարզի Մյասնիկյանի շրջանն ունի 8 հայկական գյուղ: Մյասնիկյանի շրջանում, ընդհանուր առմամբ, բնակվում է 30 հազար հայ, միայն Չալթրում` 15 հազար: Սուրբ Համբարձում եկեղեցու հոգևոր հայր Տեր Թադևոս Հայբարյանը նշել է, որ այստեղ հայապահպանությունը բարձր մակարդակի վրա է. «Ընտանիքներում երեխաներին դեռևս մանկուց են սովորեցնում հայերենը, պահպանվում են հայկական ավանդույթները` սկսած արհեստներից վերջացրած ճաշատեսակներով»:

Ռոստովի մարզի Մյասնիկյանի շրջանում է գտնվում նաև Նոր Նախիջևան հայկական քաղաքը: