Նախարարը գոհ է

ԿԳՆ-ում գոհ են տնօրենների հավաստագրման գործընթացի օբյեկտիվությունից: «Չի եղել գեթ մեկ հիմնավորված բողոքի դեպք` կապված օբյեկտիվության հետ: Ընդհանրապես չկան խոսակցություններ եւ փաստեր` նաեւ կոռուպցիոն երեւույթների հետ կապված»,- այսօր լրագրողներին ասաց ԿԳ նախարար Արմեն Աշոտյանը:

Նա նշեց, որ հավաստագրման հետ կապված բոլոր գործընթացները գտնվում են հասարակական դիտորդների ուշադրության կենտրոնում, կատարվում են մամուլի, ԱԺ պատգամավորների եւ ընդդիմության ներկայությամբ, ինչն էլ ապացուցում է, որ գործընթացը շատ թափանցիկ է եւ բավական արդյունավետ է եղել:

Նախարարը տեղեկացրել է, որ տնօրենների հավաստագրում տեղի է ունենալու տարին երկու անգամ, հետեւաբար` սեպտեմբերի սկզբին կմեկնարկի ատեստավորման նոր փուլ:

Շուտով կսկսվի նաեւ անորոշ ժամկետով պաշտոնավարող տնօրենների` դպրոցներում անցկացվող ընտրությունների փուլը: Այդպիսիք հանրապետությունում 800-ից ավելի են: