Առաջին սեռական ակտն ունենում են 15-16 տարեկանում

Մոտ 10-15 տարի առաջ սեռական առաջին հարաբերություններ ունենալու` տղաների տարիքը միջինում կազմում էր 18 տարեկան, իսկ այսօր ուսումնասիրությունները ցույց են տալիս, որ այդ տարիքը 15-16-ն է: Իսկ աղջիկների դեպքում եղել է 20 տարեկանից բարձր, այժմ` 17-18:

Այս մասին այսօր լրագրողների հետ հանդիպման ժամանակ ասաց սեքսապաթոլոգ Վրեժ Շահրամանյանը եւ հավելեց, որ պատճառը ոլորտի նկատմամբ գերհետաքրքրությունն է, քանի որ այն որոշակիորեն փակ է:

Բժիշկների` իրենց այցելուների շրջանում արած հետազոտությունը ցույց է տալիս նաեւ, որ տղաների գրեթե 60 տոկոսն առաջին սեռական հարաբերությունը ունենում են վճարովի ծառայություն մատուցող կանանց հետ:

Ինչպես նշեց Վրեժ Շահրամանյանը, Երեւանի մի քանի դպրոցում անցկացվել են անանուն հարցումները ցույց են տվել, որ 15-16 տարեկան տղաներն արդեն ունեն սեռական կյանքի փորձ, սակայն թե ի՞նչ պայմաններում եւ ի՞նչ ինֆորմացիայի ազդեցության տակ են վարում նրանք այդ կյանքը, հարցի մյուս կողմն է:

Նույնը չի վերաբերում մարզերին. այնտեղ տարիքային ցուցանիշն անփոփոխ է` չի նվազել: