Երեւանն էլ էն չէ

Երեւանի արտաքին տեսքը վերջին շրջանում շատերին է մտահոգում.  մեծն Թամանյանի նախագծից շեղումները շարունակում են թափ առնել:

Երեւանի ավագանու անդամ, ճարտարապետ Լեւոն Իգիթյանը եւ մշակութաբան Հենրիկ Գարուկյանը կողմ են քաղաքում տեղի ունեցող փոփոխություններին` շինարարություններին,  առեւտրականների բացօթյա գործունեությունը կասեցնելուն եւ այլն:

Ավելին, ըստ Իգիթյանի,  շատ հայ ճարտարապետներ այսօր թյուրիմացության մեջ են գցում լրագրողներին եւ հանրությանը` ասելով, թե Օղակաձեւ զբոսայգու տեսքը խաթարում են սրճարանները: Իգիթյանի խոսքով` այգու տեսքը եւ Օղակաձեւ այգու թամանյանական գաղափարը հենց նույն ճարտարապետներն են խաթարել` ԽՍՀՄ-ի օրոք արգելք չդնելով արվեստի աշխատողների համար բնակելի շենքի կառուցման նախագծին:

«Ես բնակելի շենքին դեմ չեմ, բայց հենց դրանով խաթարվեց Թամանյանի գաղափարը»,- ասաց Իգիթյանը:

Գարուկյանը նշեց, որ համաձայն է այն մտքի հետ, որ Երեւանն «էլ էն չէ», քանի որ մարդկանցով է քաղաքը քաղաք, ուստի` մարդիկ են սխալ ապրել:

«Քաղաքի հետ լավ չենք վարվում, եւ ինչ-որ աղբ է շարունակ լցվում քաղաք: Այգիներում պետք է կապիտալ շինություններ չլինեն, այլ լինեն տաղավարային սրճարաններ, իսկ մենք ինչ ենք տեսնում` թույլտվությունը ստանում են ու կառուցում` ինչ ուզում են»,- ասաց Գարուկյանը: