Գերմանիան համաձայն է ընդունել Մուբարաքին

Գերմանիան կընդունի Եգիպտոսի նախագահ Հոսնի Մուբարաքին, եթե նա որոշի բուժման մեկնել գերմանական հիվանդանոցներից մեկը. հայտարարել է ԳՖՀ՟ում կառավարող Քրիստոնեա-դեմոկրատական կուսակցության գլխավոր քարտուղար Ռուպրեխտ Պոլենցը։

Ավելի վաղ տեղեկացվել էր, որ Մուբարաքը կարող է բուժման նպատակով Գերմանիա մեկնել եւ, այդպիսով, հրաժարվել իշխանությունից Եգիպտոսում, որտեղ արդեն երկու շաբաթ է՝ նրա կառավարումից դժգոհ քաղաքացիները բազմահազարանոց ցույցեր են անում։

Պոլենցը, որը Բունդեսթագում գլխավորում է արտաքին քաղաքականության հանձնաժողովը, ասել է, թե Գերմանիան կընդունի Մուբարաքին՝ թեկուզ մարդասիրական նկատառումներից ելնելով։ Նա միաժամանակ ընդգծել է, որ արեւմտյան երկրները չպետք է ճնշում գործադրեն Եգիպտոսի վրա, որպեսզի չխանգարեն աֆրիկյան այդ պետության քաղաքացիներին՝ ընտրելու իրենց ապագան։